Արևմուտքին անհրաժեշտ է ամենայն լրջությամբ վերաբերվել հետխորհրդային տարածքում ինտեգրման նախագծերին, մասնավորապես՝ Եվրասիական տնտեսական միությանը (ԵՏՄ), քանի որ Ռուսաստանի և այլ երկրների միջև կոոպերացիայի զարգացումը վկայում է ռուսական արտաքին քաղաքականության նոր գծի մասին: Այս մասին գրում է ամերիկյան The National Interest ամսագիրը:
Մայիսի վերջին Ռուսաստանի, Բելառուսի և Ղազախստանի նախագահներ Վլադիմիր Պուտինը, Ալեքսանդր Լուկաշենկոն և Նուրսուլթան Նազարբաևը պայմանագիր են ստորագրել ԵՏՄ-ի ստեղծման մասին:
«Չարժե, որ Արևմուտքն անտեսի Վլադիմիր Պուտինի ինտեգրացիոն նախագծերը: Երկու այլ նախագծեր, որոնք ստեղծվել են սառը պատերազմի ավարտից հետո՝ Շանհայի համագործակցության կազմակերպությունը (ՇՀԿ) և BRICS-ը, ևս սկզբում հայտարարվել էին ինտեգրման «ոչ ակտուալ և անիմաստ փորձեր»: Սակայն մի քանի տարի անց 2 կառույցներն էլ դարձան շատ խորը և նշանակալի»,- գրում է պարբերականը:
ԱՄՆ-ի կարծիքով՝ ՇՀԿ-ն և BRICS-ը շատ ավելի թույլ միություններ են, քան ՆԱՏՕ-ն և ԵՄ-ն: Սակայն պետք չէ, որ Վաշինգտոնը դրանով մխիթարի իրեն, քանի որ սառը պատերազմից հետո ուժեղ միություններ ստեղծելու ԱՄՆ-ի փորձերը թույլ են եղել՝ գրում է The National Interest-ը:
«Հնարավոր է՝ առայժմ ՇՀԿ-ն և BRICS-ը չեն կարող մրցակցել ԵՄ-ի և ՆԱՏՕ-ի հետ, սակայն այդ կազմակերպությունները զարգացնում և ուժեղացնում են դրանցում ընդգրկված երկրների միջև կոոպերացիայի հնարավորությունները: Երկարաժամկետ հեռանկարով դա կարող է դառնալ տնտեսության և անվտանգության ոլորտում շատ ավելի լուրջ փոխներգործության հիմք»,- գրում The National Interest-ը:
«ՇՀԿ-ն և BRICS-ը, հիմա նաև՝ ԵՏՄ-ն նոր, ճկուն և դինամիկ ոճի արտացոլումն են ռուսական արտաքին քաղաքականության, որն ուղղված է միջազգային հարթակում Ռուսաստանի ազդեցության մեծացմանը: Եվ սա գործընթաց է, որին մենք պետք է շատ ավելի լրջորեն վերաբերվենք»,- գրում է պարբերականը:
