Ուկրաինան «ոչ մի տեղ չի փախչի» Եվրասիական տնտեսական միության (ԵՏՄ) հետ համագործակցությունից: Այս մասին, ինչպես հաղորդում է RIA Novosti-ն, հայտարարել է Բելառուսի նախագահ Ալեքսանդր Լուկաշենկոն սերբիական ԶԼՄ-ներին տված հարցազրույցում:
Հիշեցնենք, մայիսի 29-ին Ռուսաստանը, Ղազախստանը և Բելառուսը Աստանայում ստորագրեցին ԵՏՄ ստեղծման պայմանագիրը, որն ուժի մեջ կմտնի 2015թ. հունվարի 1-ից՝ ազգային խորհրդարաններում վավերացվելուց հետո:
«Դեռ պայմանագիրը ստորագրելու փուլում երեք պետությունների հետաքրքրությունը դրա նկատմամբ հսկայական էր: Ես չեմ խոսում Չինաստանի մասին. մենք արդեն նրա հետ բանակցում և համագործակցում ենք: Այսօր Վիետնամը, Հնդկաստանը, այլ պետություններ հայտարարել են դրա մասին (ԵՏՄ-ի նկատմամբ իրենց հետաքրքրության-խմբ.): Ես համոզված եմ, որ Ուկրաինան ոչ մի տեղ չի փախչի այդ միության հետ համագործակցությունից… Եվ դա ճիշտ է, քանի որ ծնվում է, ինչպես ես եմ հասկանում, ուժի նոր կենտրոն: Հնարավոր է, դա լրացուցիչ ներդրում է բազմաբևեռ աշխարհում»,- ասել է Լուկաշենկոն:
