Երեկ հայ-ադրբեջանական սահմանագոտու հարավարևելյան ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի արձակած կրակոցից մահացու հրազենային վիրավորում են ստացել պայմանագրային զինծառայողներ Անդրանիկ Սամվելի Եղոյանը և Բորիս Բենիկի Գասպարյանը:
Պայմանագրային զինծառայողները փաստում են, որ Երասխավանի պահակետն ամենավտանգավորներից մեկն է, կոչվում է «Գազան պոստ»:
Երեկ տեղի ունեցածը ցնցել է նաև Արարատի մարզի Երասխավան գյուղի բնակիչներին, ովքեր խոր ցավ են ապրում պայմանագրային զինծառայողների համար:
Երասխավանի գյուղապետ Ռադիկ Օղիկյանը «Առաջին լրատվական»-ի հետ զրույցում նշեց, որ կրակոցներ հաճախակի են լինում, մեկ-երկու կամ երեք հատ, բայց նման սարսափելի զարգացումներ, որ երկու պայմանագրային զինծառայող զոհվի, վերջին ութ-ինը տարվա պատմության մեջ առաջին անգամ էր:
Նա նշեց, որ Երասխավանը սահմանապահ գյուղ է, իսկ բնակչությունը միշտ էլ պատրաստակամ է զինվորի կողքին լինելու ցանկացած հարցում:
Գյուղում խուճապ չկա: «Կին թե տղամարդ, բոլորն էլ տղամարդավարի կանգնած են: Անսովոր է միայն 95-ից այս կողմ ծնվածների համար: Խուճապ չկա, ամեն մարդ վեցից հետո ամեն մեկն իր տանը իր առօրյա գործով վար ու ցանք է անում, ապրում են, տան հոգսերը հոգում»,- հավելեց գյուղապետը:
Նա նշեց, որ երեկ՝ ժամը 18:00-ից հետո, այլևս կրակոցներ չեն հնչել: Կրակոցներ հաճախ լինում են ցերեկը. «Շատ ժամանակ օդ են կրակում, ժամը 6-ից հետո կրակահերթեր՝ որպես այսպիսին, չեն եղել»,- ասաց նա:
Երասխավանի գյուղապետը նշեց, որ գյուղից թուրքին կարելի է տեսնել 100 մետր հեռավորությունից մինչև մեկ մետրը:
Երասխավանից քիչ չեն պայմանագրային ծառայողները. շուրջ 15-20 սպա և ենթասպա կա գյուղից:
Հայաստանում արտագաղթը Երասխավան գյուղում, ըստ գյուղապետի, ժամանակավոր բնույթ է կրում, գնում են հիմնականում արտագնա աշխատանքի. «Մարդիկ գնում են, աշխատում, ստեղծում բերում, որ իրենց տունը վերանորոգեն, ամենավերջին տեխնիկան ունենան, իսկ ինչո՞վ են պակաս մյուսներից, քաղաքի բնակչությունից: Մարդիկ են, աշխատում են, ստեղծում են, բանվորություն անում, քաղհան անում, հող մշակում, այնպես չէ, որ բոլորն աշխատանք ունեն, և ընտիր վիճակ է, ամեն մի գյուղ իր խնդիրներն ու հոգսերն ունի»,-հավելեց Ռադիկ Օղիկյանը:
Նա նշեց, որ վերջին մի քանի տարիների վիճակագրությունը ցույց է տալիս, որ գյուղում շատացել են հարսները, անգամ Ղարաբաղից հարս ունեն, երեխաների առումով աճ կա:
