Այսօր Համաշխարհային բանկը ներկայացրեց Հայաստանի հանքարդյունաբերության ոլորտին նվիրված երկու ՝ «Հայաստանի հանքարդյունաբերության ոլորտում կայուն և ռազմավարական որոշումների կայացումը» և «Հայաստանի լեռնահանքային արդյունաբերության ոլորտի բնապահպանական և սոցիալական կայունության բարելավում» թեմատիկ աշխատանքները, որտեղ կային ոլորտի կարգավորման ուղղությամբ մշակված առաջարկներ, մասնավորապես՝ ուժեղ կարգավորիչ վերահսկում, հաշվետվողականություն, մոնիտորինգի հսկում, թափանցիկություն և այլն:
Ներկայացված զեկույցների վերաբերյալ բնապահպան-ակտիվիստ Աննա Շահնազարյանը նշեց, որ Համաշխարհային բանկի ներկայացրած ուսումնասիրությունների առնչությամբ քննադատական մոտեցում ունի: Նա նշեց, որ զեկույցներում հիմնական աղբյուրները պետական աղբյուրներն են: «Տվյալները գալիս են շատ հակասական, և այսօր էլ այդ մասին նշվեց»,- ասաց նա՝ դժգոհություն հայտնելով, որ չեն դիմել քաղաքացիական խմբերին, ՀԿ-ներին, որոնք ամբողջական պատկերը կներկայացնեին:
«Մեկ պոչամբարի տեղ էլ ես գիտեմ Սևանի հարևանությամբ, ես էլ կասեի, կիմանայինք, որ ոչ թե 19 պոչամբար, այլ 20, 21 են: Ինչու չեն օգտվել խաչաձև ստուգումների տվյալներից»,-ասաց նա:
Համաշխարհային բանկի բնապահպանության առաջատար մասնագետ Ադրիանա Դամիանովան լրագրողների հետ զրույցում Ձեզ համար ընդունելի՞ էր քաղաքացիական ակտիվիստի քննադատությունը, որ զեկույցը գրելիս համագործակցել եք պետական կառույցների հետ, և հաշվի չեն առնվել քաղաքացիական հասարակության, ՀԿ-ների տվյալները հարցին ի պատասխան նշեց. «Քանի որ փաստաթղթերը հանրային և պետական բնույթի փաստաթղթեր են, մենք, այն մշակելով, հիմնվում ենք պաշտոնական տվյալների վրա, թեպետ չենք սահմանափակվում դրանցով, փորձում ենք նաև տեղեկատվության այլ աղբյուրներին հետևել, ինչը արել ենք նաև այս ծրագրի շրջանակներում:
Առաջին փաստաթուղթը մշակելուց հետո քննարկում ենք կազմակերպել, աշխատել ենք ներգրավել քաղաքացիական հասարակությանը, դրա համար համաձայն չեմ քաղաքացիական ակտիվիստի այն կարծիքին, որ մենք անտեսել ենք հասարակական կազմակերպությունների մասնակցությունը»,- ասաց Ադրիանա Դամիանովան:
Ավելին՝ տեսանյութում:
