1915-ից 1922 թվականներին ընկած ժամանակահատվածում Թուրքիայում սպանդի ենթարկված 1,5 միլիոն հայ քրիստոնյաներից երկուսը եղել են Մասաչուսեթս նահանգի Օքսֆորդ քաղաքի բնակիչ՝ քաղաքի ավագանու առաջին կին անդամ Էլիս Քուլունգյան-Ուոքերի նախնիները: Այս մասին հայտնում է «Ամերիկայի Ձայն»-ը:
«Ամերիկայում ծնվել եմ ես: Իմ ծնողները փախուստի էին դիմել Հայաստանից: Նրանց ընտանիքներին չէր հաջողվել փրկվել», – ասում է Քուլունգյան-Ուոքերը, որի ընտանիքի Հայոց ցեղասպանությունը վերապրելու պատմությունը ներկայացնում է «Ուորչեսթեր Տելեգրամ» պարբերականը:
Էլիս Քուլունգյան-Ուոքերի համաձայն, երբ այս տարի քաղաքի ավագանու ամենամյա ժողովի ժամանակ իրեն գովասանքի են արժանացրել, դրանով քաղաքը նաև ճանաչել է գրեթե մեկ դար առաջ Հայոց ցեղասպանության ընթացքում նահատակված յուրաքանչյուր անձի արժանիքները:
Էլիս Քուլունգյան-Ուոքերը և Ջեյմս Ուոքերը, որի հետ Էլիսն ամուսնացած է արդեն 63 տարի, միասին դաստիարակել են չորս երեխա, ինչպես նաև բազմաթիվ որդեգրած երեխաներ, միշտ աջակցություն են ցուցաբերել Օքսֆորդ քաղաքի համայնքին:
«Երբ Հիտլերը սկսել էր իրագործել Հրեական ողջակիզումը, իրեն նախազգուշացողներին նա ասել էր՝ «Ո՞վ է հիշում հայերին»: Եթե Հայոց ցեղասպանությունը ճանաչվեր, Հրեական ողջակիզումը տեղի չէր ունենա: Այն պետք է հիշել, որպեսզի նման ոճրագործություն այլևս երբեք չկրկնվի», – ասել է Օքսֆորդ քաղաքի բնակիչ՝ քաղաքի ավագանու առաջին կին անդամ Էլիս Քուլունգյան-Ուոքերը:
