Ուկրաինայի նորընտիր նախագահ Պյոտր Պորոշենկոն գերմանական Bild պարբերականին տված հարցազրույցում հայտարարել է, որ երկիրն ԱՄՆ-ի ու ԵՄ-ի հետ անվտանգության մասին նոր համաձայնագրի կարիք ունի՝ ապահովելու ռազմական պաշտպանություն: Այս մասին Պորոշենկոն հայտարարել է՝ պատասխանելով հնարավո՞ր է Ուկրաինայի մուտքը ՆԱՏՕ հարցին:
Պորոշենկոյի կարծիքով՝ անդամակցությունը ՆԱՏՕ-ին պետք է ստանա երկրի քաղաքացիների մեծ մասի հավանությունը, սակայն ներկայումս նման մեծամասնություն չկա: «Ընդհանուր առմամբ մեզ անհրաժեշտ է ԱՄՆ-ի ու Եվրոպայի հետ անվտանգության նոր միություն՝ պաշտպանելու Ուկրաինան ռազմական միջոցներով: Ես՝ որպես նախագահ, կպայքարեմ այդ միության ձևավորման համար և անհապաղ բանակցություններ կսկսեմ»,- ասել է Պորոշենկոն:
Ավելի վաղ Պորոշենկոն հայտարարել էր, որ մտադիր է նախաձեռնել անվտանգության նոր համակարգի ստեղծում Բուդապեշտի հուշագրի փոխարեն:
Պորոշենկոն մեկնաբանել է նաև երկրի արևելքի ուժային գործողությունը, որը կտրուկ ակտիվացել է ընտրություներից անմիջապես հետո:
«Հակաահաբեկչական արշավը վերջապես իսկապես սկսվեց»,- ասել է նա: Նա ասել է նաև, որ Կիևի իշխանությունները չեն ձգտում ոչնչացնել անջատողականների առաջնորդներին, այլ պարզապես ցանկանում են բռնել նրանց ու դատարան հանձնել:
Պորոշենկոն Վլադիմիր Պուտինի հետ բանակցելու մտադրություն է հայտնել: «Ես անպայման կխոսեմ Պուտինի հետ և բանակցություններ կանցկացնեմ՝ կայունացնելու իրավիճակը»,- նշել է Պորոշենկոն: