Սյունիքի նախկին մարզպետ Սուրիկ Խաչատրյանի եղբորորդու՝ Էներ Խաչատրյանի մասնակցությամբ վեճի տուժողներից երկրորդը՝ Արթուրը ևս ներկայացել է ոստիկանության Գորիսի բաժին և բացատրություն տվել: Այս մասին «Առաջին լրատվական»-ի հետ զրույցում ասացին Ոստիկանության լրատվական ծառայությունից՝ հավելելով, որ նրա նկատմամբ նշանակվել է դատաբժշկական փորձաքննություն:
Նշենք, որ վեճը տեղի էր ունեցել մայիսի 25-ի երեկոյան: Էներ Խաչատրյանն իր ընկերների հետ հարբած վիճակում մտել էր Գորիսում Կուլակ անունով հայտնի Գուրգեն Հարությունյանի տուն և դաժանաբար ծեծել նրա որդիներին՝ Արթուրին և Գոռին: Ծեծից հետո թույլ չէին տվել, որ շտապօգնության մեքենան տաներ ծեծված երիտասարդներին, այլ իրենց մեքենայով նրանց տարել էին անհայտ ուղղությամբ: Ապա նախ՝ Գոռ Հարությունյանն էր ներկայացել ոստիկանություն, իսկ այսօր արդեն՝ Արթուրը: Երկու եղբայրներից բացի՝ ոստիկանությունում բացատրություն է տվել նաև Էներ Խաչատրյանը:
Թեև փորձաքննության պատասխանները դեռ չկան, սակայն խոսվում է, որ դանակահարություն չի եղել. տեղի է ունեցել վեճ, որը վերաճել է ծեծկռտուքի:
«Առաջին լրատվական»-ի տեղեկություններով՝ Խաչատրյանների և Գորիսում հայտնի Կուլակի ու նրա տղաների միջև վեճի պատճառը փողային պարտքուպահանջն է: Նրանց միջև փողային հին չլուծված հարցեր են եղել, և հենց այդ հարաբերությունները պարզելիս էլ տեղի է ունեցել վեճը:
