ՀԱԿ խմբակցության պատգամավոր Նիկոլ Փաշինյանը մայիսի 26-ին Ազգային ժողովում 2013 թվականի բյուջեի կատարողական հաշվետվության վերաբերյալ Վերահսկիչ պալատի եզրակացությունից հետո նշեց, որ ՎՊ ներկայացուցիչը գոնե կարճաժակետ հերքեց այն, ինչ ասաց կառավարության ներկայացուցիչը: Փաշինյանը նշեց, որ կատարվողն իրեն հիշեցրեց ԿԲ-ի ոսկու պատմությունը, երբ ասում էին՝ ինչու վաճառեցիք ոսկու պաշարները, այն ժամանակ ԿԲ նախագահ Տիգրան Սարգսյանն ասում էր, որ արդյունավետ չէ, բայց որոշ ժամանակ անց ոսկու գները երկրաչափական պրոգրեսիայով աճեցին:
«Հիմա այստեղ էլ ՎՊ-ի ներկայացրած տվյալները կասկածի տակ են դնում կառավարության կանխատեսելու ընդունակությունը, թե ինչ է կատարվում միջավայրում: 800 միլիոն դոլարը նախատեսված չի եղել պետական բյուջեի նախագծով, բայց ծախսը կատարվել է: Օրենքով կառավարությունը բյուջեում որոշակի փոփոխություններ անելու իրավունք ունի, բայց հետաքրքիր է՝ 800 միլիոնն այդ լիազորության շրջանակում տեղավորվո՞ւմ է, թե՞ կառավարությունը գերազացել է իր լիազորությունները»,- ասաց նա:
ՎՊ խորհրդի անդամ Սեյրան Ավագյանը նախ նշեց, որ, սկսած 2002-ից, տեղի է ունեցել լիազորությունների ընդլայնում օրենքով, Վերահսկիչ պալատն օրենքի խախտում չի արձանագրում, պարզապես Ազգային ժողովի ուշադրությունն է հրավիրում այն հանգամանքի վրա, որ այդ միջոցները կարող են շատ ավելի մեծ լինել: Ավագյանը նշեց, որ հարցը այստեղ քննարկվելու խնդիր ունի, քանի որ իրենք ռիսկեր են տեսնում:
Ավագյանի խոսքով՝ ՎՊ-ն պնդում չունի, որ այդ որոշումը եղել է սխալ կամ ճիշտ, իրենք առանձին բաղադիչներով ուզում են ուշադրություն հրավիրել այն հանգամանքի վրա, որ արտաքին պարտքի այն սցենարը, որ գոյացավ այս երկու որոշումներով, իր մեջ ռիսկեր է պարունակում»: ՀԱԿ պատգամավորն արձագանքեց, թե այդ ավել ծախսված 800 միլիոնից 300 արտաքին պարտքի հետ է կապված, և եթե դա էլ հանում են, մոտավորապես 25-30%-ով շեղում է լինում: «Վերահսկիչ պալատի դաշտը չեն քաղաքական վճիռները, և ես չպիտի որոշեմ՝ կառավարությունը անցե՞լ է այդ լիազորությունների սահմանը, թե ոչ»,- ասաց նա:
