Այսօր տեղի էր ունեցել ՀՀԿ գործադիր մարմնի հերթական նիստը, որը վարել է ՀՀ նախագահ Սերժ Սարգսյանը:
Նիստից հետո լրագրողների հետ զրույցում ԱԺ փոխնախագահ, ՀՀԿ խոսնակ Էդուարդ Շարմազանովն տեղեկացրել է, որ նիստի ընթացքում հաստատվել է դեկտեմբերի 15-ին կայանալիք համագումարի օրակարգը: Այդ օրը ՀՀԿ արտահերթ համագումարի օրակարգում լինելու է միայն 2013 թ. նախագահական ընտրություններում Սերժ Սարգսյանի առաջադրման հարցը:
Շարմազանովը մեկնաբանել է ԲՀԿ-ի` կառավարման խորհրդարանական համակարգին անցնելու առաջարկը և նշել, որ ՀՀԿ-ի համար ամենակարևորը խնդրի բովանդակությունն է, ուստի այն իրենց այնքան էլ չի հետաքրքրում:
Իսկ ՀՅԴ-ի մասին խոսելով` ՀՀԿ խոսնակը նշել է, որ մեծ հարգանք է տածում ՀՅԴ-ի հանդեպ, սակայն, ըստ նրա, ՀՅԴ-ն այսօր կանգել է շատ լուրջ խնդրի առաջ և գիտակցում է, որ իր մեջ մրցունակ նախագահի թեկնածու չունի։
ՀԱԿ-ն, ըստ Շարմազանովի, կարճատև պրոյեկտ է, և ներկա պահին ՀԱԿ-ում 7 հոգով 8 երգ են երգում:
Էդուարդ Շարմազանովի հավաստմամբ՝ «առաջիկայում մի շարք դիմակազերծումներ են սպասվում»:
Նշենք, որ մինչ ՀՀԿ-ն նիստ էր անում, մի խումբ արմավիրցիներ բողոքի ակցիա էին կազմակերպել ի պաշտպանություն Արմավիրի քաղաքապետի ընտրություններում քաղաքապետի թեկնածու Սևակ Մինասյանի, ով վերջերս է կալանավորվել խուլիգանության համար:
ՀՀԿ գործադիր մարմնի նիստից հետո Սերժ Սարգսյանը մոտեցել է բողոքի ակցիայի մասնակիցներին և լսելով նրանց խնդիրն ասել. «Սևակ Մինասյանը ձերբակալվել է օրինական, իսկ եթե խնդրանք ունեք, ձեր խնդրանքը կլսեմ»:
