Այս տարվա սեպտեմբերին ՀՀ-ում արդյունաբերության ծավալը կազմել է 94 մլրդ 322 մլն դրամ, որը 2011 թ. սեպտեմբերի համեմատ ավելի է 0.3 %-ով, սակայն 2012 թ. օգոստոսի համեմատ պակաս է 0.2 %-ով: Ազգային վիճակագրական ծառայության տվյալների համաձայն` 2012 թ. հունվար-սեպտեմբերին արդյունաբերության ծավալը եղել է 796 մլրդ 430.4 մլն դրամ, որը նախորդ տարվա նույն ժամանակաշրջանի համեմատ ավելի է 11.6 %-ով:
Արդյունաբերության ոլորտներից ամենամեծ աճն անցած 9 ամսում՝ նախորդ տարվա հունվար-սեպտեմբերի համեմատ, գրանցվել է հանքագործության մեջ` 15.7 % (սեպտեմբերին օգոստոսի համեմատ գրանցվել է անկում՝ 9.1 %), մշակող արդյունաբերությունում` 9.3 % (սեպտեմբերին օգոստոսի համեմատ աճը` 2.8 %), էլեկտրաէներգիայի, գազի, գոլորշու և լավորակ օդի մատակարարման ոլորտում` 13.5 % (սեպտեմբերին օգոստոսի համեմատ անկումը` 1.2 %), ջրամատակարարման, կոյուղու, թափոնների կառավարման և վերամշակման ոլորտում` 34.6 % (սեպտեմբերին օգոստոսի համեմատ անկումը` 2.5 %):
Ի դեպ, մշակող արդյունաբերության մեջ առավել մեծ աճ արձանագրվել է ծխախոտի և խմիչքների արտադրությունում, համապատասխանաբար՝ 56.5 % և 28.1 %, իսկ ահա այնպիսի արտադրություններում, ինչպիսիք են մանածագործությունը, հագուստի և քիմիական արտադրությունները, գրանցվել է համապատասխանաբար` 35.5 %, 9.8 %, 12.5 % անկում:
