Այսօրվա Ուկրաինան նախորդ դարի իննսունականների Վրաստանն է. մասնատված է, մասեր կան, որ այլևս իրենը չեն, կկարողանա՞ նա դրանք հավաքել՝ հայտնի չէ: Մայիսի 6-ին լրագրողների հետ հանդիպմանը քաղաքագետ Ալեքսանդր Իսկանդարյանը նշեց, որ Վրաստանի դեպքում դրա վրա տասնամյակներ անցան, իսկ Ուկրաինան առաջիկա ամիսներին դժվար վերականգնվի:
«Ուկրաինայում իրավիճակը կարևոր է ողջ տարածաշրջանի համար: Փոխվում է Ռուսաստանի դերը շրջապատող տարածքներում, Ռուսաստանը կլինի այլ, ոչ այն, ինչ եղել է մինչ ուկրաինական զարգացումները: Փոխվում է ՌԴ-ԱՊՀ հարաբերությունների ձևաչափը: Հետխորհրդային պատմությունն ավարտվեց: Այն արդեն իսկ վերջացած է. հետխորհրդային տարածաշրջանը դառնում է ինչ-որ այլ բան, ոչ հետխորհրդային:
Այդ պատմության կարևոր բանալիներից մեկն ԱՊՀ-ն էր, ՌԴ համար հետխորհրդային տարածքների «սրբությունը»: Այս գործընթացը սկսվեց Ռուսաստանի կողմից Աբխազիայի և Հարավային Օսիայի ճանաչումից հետո»,- ասաց նա:
Իսկանդարյանի խոսքով՝ սկսվում է նոր աշխարհը, նոր աշխարհակարգ: Առնվազն այն տարածքում, որտեղ մենք ապրում ենք, այն է՝ հետխորհրդային տարածքում, կլինեն նոր խաղի կանոններ, նոր մարտահրավերներ ու վտանգներ:
Ուկրաինայում նախագահական ընտրությունների անցկացմանն անդրադառնալով՝ քաղաքագետը նկատեց, թե՝ ասել, որ Մոսկվան շատ է ցանկանում Կիևի ամրապնդումը, ճիշտ չի լինի: Նրա խոսքով՝ ներկայումս ակնհայտ է՝ ով կընտրվի: Այն, որ ընտրությունները սարսափելի պայմաններում կանցնեն, նույնպես ակնհայտ է:
Իսկանդարյանը նկատեց, որ, սովորաբար, նման պայմաններում ընտրություններ կազմակերպում են իրավիճակը կայունացնելու, իշխանություններին լեգիտիմացնելու համար: Ուկրաինան հիմա չափազանց ապակայունացած է, և այս ընտրությունները կայունացում չեն կարող տալ:
Ըստ քաղաքագետի՝ ուկրաինական բանակը գուցե Սլավյանսկը վերցնելու ռեսուրս ունի, բայց ռեսուրս չունի գրավելու Արևելքը: «Կարծում եմ՝ այսօր Ռուսաստանում համոզմունք կա, որ ուկրաինացիներն իրենք կկարողանան հասնել իրենց երկրի կործանմանը, ուստի չեն շտապում: Այս իրավիճակը նաև տնտեսական հետևանքներ ունի, ինչպես՝ գազի գնի կտրուկ բարձրացում, դոլարի գնի կտրուկ աճ. Արևմուտքի և Արևելքի միջև խզվածությունը մեծ է: Արդյունաբերական ճգնաժամ կարող է ստեղծվել»,- ասաց նա՝ չբացառելով երկրորդ Մայդանի հնարավորությունը:
ԼՂ խնդրի հարցում վերջին շրջանում նկատվող ակտիվացմանն անդրադառնալով՝ Իսկանդարյանը նկատեց՝ ադրբեջանցիները նյարդայնանում են, ու դա ակնհայտ է: Իբրև դրա վկայություն՝ քաղաքագետը նշեց նաև Ռաուֆ Միրկադիրովի, Յունուս ամուսինների ձերբակալությունը: Բանախոսը տեսակետ հայտնեց, որ, հավանաբար, առաջիկայում նույն Ջեյմս Ուորլիքի հայտարարությունը կլինի: «Իհարկե, Մինսկի գործընթացը կփորձեն պահել, և նրանք կաշխատեն պահպանել առկա իրավիճակը, բայց կարծում եմ՝ ամեն դեպքում, այս անգամ ինչ-որ ռեակցիա պիտի լինի»,- ասաց նա:
