Հաիթիի կառավարությունը չորեքշաբթի արտակարգ դրության ռեժիմ է սահմանել երկրի ողջ տարածքում՝ կապված «Սենդի» փոթորկի հասցրած վնասների հետ: Այս մասին հայտնում է RIA Novosti-ն՝ հղում անելով լատինաամերիկյան ԶԼՄ-ներին:
Վերջին տվյալներով՝ կղզի-պետությունում տարերային աղետի հարվածի հետևանքով զոհվածների թիվը հասել է 54-ի, ևս 21-ն անհետ կորած են համարվում: Արտակարգ դրությունը սահմանվել է 30-օրյա ռեժիմով:
«Սենդի» փոթորիկն անցել է Կարիբյան ծովի կղզիներով՝ դառնալով մարդկային և նյութական կորուստների պատճառ տարածաշրջանի բազմաթիվ երկրներում՝ Ճամայկայում, Կուբայում և Բահամանյան կղզիներում: Սակայն Հաիթիի համար տարերային աղետի հարվածն առավել զգալի էր՝ կապված երկրում տիրող ծանր տնտեսական իրադրության հետ: Երկիրը դեռևս ամբողջությամբ չի հաղթահարել 2010 թվականին ավերիչ երկրաշարժի հետևանքները:
Հաիթիում ավերվել են ժամանակավոր ճամբարների մի մասը, որոնցում մինչ օրս ապրում էին երկրաշարժի հետևանքով տանիքից զրկված մարդիկ: Այդ ճամբաներում բնակվող 370 հազար մարդկանցից 18 հազարը կրկին անօթևան են մնացել: Վարարած գետերը ավերել են ճանապարհներ, կամուրջներ, ջրածածկ արել գյուղատնտեսական նշանակության տարածքներ:
Բժիշկները մտավախություն ունեն, որ ուժգին ջրհեղեղը կարող է լրջորեն մեծացնել խոլերայի նոր համաճարակի ռիսկը: 2010 թվականի հոկտեմբերից Հաիթիում խոլերայից ավելի քան 7.5 հազար մարդ է մահացել:
Հաիթիին օգնություն է տրամադրում Վենեսուելան, որը արդեն կղզի-պետութուն է ուղարկել մարդասիրական օգնության առաջին բեռները՝ ընդհանուր 240 տոննա քաշով: Առաջիկա օրերի ընթացքում Կարակասը Հաիթի կուղարկի մարդասիրական բեռներով ևս մեկ օդանավ:
