ՀՀ վարչապետ Տիգրան Սարգսյանն այսօր Կարեն Դեմիրճյան մարզահամերգային համալիրում մասնակցել է «Դիջիթեք 2010» 6-րդ ամենամյա միջազգային տեխնոլոգիական ցուցահանդեսի պաշտոնական բացման արարողությունը։
Կառավարության ղեկավարը նշել է, որ առանց տեղեկատվական տեխնոլոգիաների անհնար է բարձրացնել ընդհանուր տնտեսական համակարգի արդյունավետությունը, իսկ օտարերկրյա կազմակերպությունների ներկայությունը Հայաստանում նոր հնարավորություններ ստեղծում տեղեկատվական տեխնոլոգիաները որպես առաջնահերթային ուղղություն դիտարկելու համար։
Ցուցահանդեսին մասնակցում է նաև Հայաստանի կառավարությունը, որն իր տաղավարում ներկայացրել է էլեկտրոնային կառավարման www.e-gov.am կայքի ծառայությունները։ Վարչապետին մասնավորապես ներկայացվել է, թե ինչպես են աշխատում լիցենզիաների ընդունման, հարկային հաշվետվությունների ներկայացման, էլեկտրոնային ստորագրություն ստանալու համակարգերը։
Ցուցահանդեսին, որին մասնակցում են 68 տեղական և միջազգային կազմակերպություններ, ներկայացվելու են տեղեկատվական տեխնոլոգիաների սարքավորումներ և համակարգեր, որոնք ապահովում են տեղեկատվական տեխնոլոգիաների կիրառում առօրյա կյանքում և բիզնեսում։