Հոկտեմբերի 28-ին ելույթ ունենալով Եվրոպայի խորհրդի տեղական եւ տարածաշրջանային իշխանությունների համաժողովի 19-րդ նստաշրջանում՝ ԵԽԽՎ նախագահ Մեւլութ Չավուշօղլուն պատասխանել է պատվիրակությունների անդամների հարցերին։
Ինչպես փոխանցում են ադրբեջանական գործակալությունները` Ադրբեջանի պատվիրակության անդամ Աբուլֆազ Բաբաեւը Մեւլութ Չավուշօղլուին հարց է ուղղել, թե ինչ ներդրում կարող է ունենալ ԵԽ տեղական եւ տարածաշրջանային իշխանությունների համաժողովը ԼՂ հակամարտության կարգավորման հարցում։ ԵԽԽՎ նախագահն իր հերթին հայտարարել է, թե կազմակերպության դերը վարվող բանակցություններին, դիվանագետներին աջակցելն է, հատկապես երկու երկրների ԵԽԽՎ պատվիրակությունների մակարդակով երկխոսության զարգացումն է։ «Բնական է, այդ տեսակ հարցերը մեր կազմակերպության հիմնական գործառույթը չեն։ Սակայն, չնայած դրան, մենք կարող ենք աջակցել երկու երկրների պատվիրակությունների բանակցություններին։ Ինչպես հայտնի է, 2005թ. ԵԽԽՎ-ն ԼՂ հակամարտության վերաբերյալ հատուկ բանաձև էր ընդունել, որի համաձայն` ԵԽԽՎ Բյուրոյին առաջարկվել է ԼՂ վերաբերյալ հատուկ հանձնաժողով ստեղծել։ Այդ գործով հիմնականում զբաղվում է ԵԱՀԿ ՄԽ-ն, եւ մենք, բնականաբար, չենք կարող խառնվել այդ հարցին։ Հակամարտության կարգավորմանն օգնելու համար մեր նպատակն է սոսկ խթանել երկխոսությունը երկու կողմերի պատվիրակությունների միջեւ։ Մենք մեծ ուշադրություն ենք դարձնում այդ հակամարտության ժամանակ առաջացած հումանիտար հարցերին։ Ռուս-վրացական պատերազմից հետո անմեղ տուժածների կյանքի բարելավման նպատակով մենք ԵԽԽՎ-ում այդպիսի հանդիպումներ անցկացրինք նաեւ այդ երկրների պատվիրակությունների միջեւ։ Ինչ վերաբերում է ԼՂ հակամարտությանը, մեր գործունեությունը մենք հիմնականում կառուցում ենք անհայտ կորածների, փախստականների եւ բռնի տեղահանվածների խնդիրների հիման վրա։ Համաժողովը նույնպես կարող է զբաղվել այդ գործով, եւ ես կարծում եմ, որ լինելով ԵԽ հիմնական կազամակերպությունը՝ նա պետք է դրանով զբաղվի»,- ասել է Մեւլութ Չավուշօղլուն։
