Այսօր Երևան ժամանեց «Արմավիա» ընկերության 3-րդ CRJ 200LR ինքնաթիռը: 50 ուղևորի համար նախատեսված նոր ինքնաթիռը կրում է մեծանուն հայ կոմպոզիտոր և դաշնակահար Առնո Բաբաջանյանի անունը:
Առաջին CRJ 200LR-ը «Արմավիա»-ն ձեռք էր բերել 2009 թ. և այն կրում է հայ մեծանուն գիտնական Սերգեյ Մերգելյանի անունը, երկրորդը` 2011 թ. մայիսին, այն կոչել են աշխարհահռչակ նկարիչ Մարտիրոս Սարյանի անունով:
CRJ 200LR-ը նախատեսված է 50 ուղևորի համար, ինքնաթիռի երկարությունը 29.9 մ է, թևերի երկարությունը՝ 21.21 մ, բարձրությունը՝ 5.87 մ, դատարկ քաշը՝ 13,7 տ, թռիչքի թույլատրելի առավելագույն քաշը՝ 21 տ, առավելագույն արագությունը՝ 860 կմ/ժ, թռիչքի երկարությունը՝ 3150 կմ, առավելագույն բարձրությունը՝ 12500 մ:
«Արմավիա» ընկերության գլխավոր տնօրենի առաջին տեղակալ Լևոն Ստեփանյանը «Առաջին լրատվականի» հետ զրույցում հպարտությամբ նշեց, որ նոր ինքնաթիռը կրում է Առնո Բաբաջանյանի անունը:
«Ինքնաթիռը շատ լավն է: Այն առաջինը չէ մեր ընկերությունում, երրորդն է, փորձված է տարբեր ուղղություններով և շատ հարմար է մեր ուղղություններով օգտագործելու համար: Ինքնաթիռը կրում է Առնո Բաբաջանյանի անունը, ինչի համար շնորհավորում եմ բոլորիս, որովհետև մենք հարստանում ենք և ունենալով նման անունով ինքնաթիռ՝ ամբողջ աշխարհում գովազդելու ենք Հայաստանը և Առնո Բաբաջանյանին՝ ոչ միայն իր երաժշտությամբ, այլև` անունով»,- ասաց Լևոն Ստեփանյանը:
