ԱԺ ՀՀԿ խմբակցության ղեկավար Գալուստ Սահակյանին բարկացրել են ընդդիմադիրների կողմից հնչող արտահայտությունները, նա ստիպված դեկտեմբերի 20-ին ԱԺ արտահերթ նիստում ասաց. «Ընդդիմություն նշանակում է սուրբ, Աստծո կողմից տրված շնորհ, և միակ ճշմարտությունը թաքնված է այդտեղ: Ես գիտեմ, որ լեզուն ոսկոր չունի, Աստված այդպես է մարդուն արարել, բայց Աստված մարդուն նաև ուղեղ է տվել: Մեր ժամանակները ծնել են նաև Փանջունիներ, դավաճաններ, չգիտեմինչեր: Դու ընդամենը կարողանում ես ծանրաձողի մոտենալ, հարյուր կիլոյի խոսք ես ասում, մեկ էլ տեսնում ես՝ հիստերիայի մեջ: Էս հիվանդանոց չի, ես էլ հոգեբույժ չեմ, չպատասխանեցինք, սրանց թվաց՝ չենք խոսելու: Մի բառը բավական է, որ փոշիանաք, խոսքը ապտակ չի»:
Անդրադառնալով «Հայռուսգազարդ»-ի բաժնետոմսերի խնդրին՝ ՀՀԿ խմբակցության ղեկավարը շեշտեց. «Ընդամենը վաճառքի խնդիր է, մեր բաժնեմասը վաճառում ենք ՌԴ-ին, մինչդեռ քննարկումներ են ընթանում՝ պարտք ենք-պարտք չենք, քանիսով ենք վաճառում, ինչպես պիտի լինի:Դրա համար ամեն ինչ օրենքով են անում: Ասում են հապշտապ է քննարկվում, սակայն երկու ամիս է՝ իրենք «ծուղրուղու են անում» վաճառքի մասին, էլ ի՞նչ հապշտապ:
Էստեղ էթիկայի հանձնաժողովի խնդիր էլ չկա, ելույթներ կան, որ հոգեբուժարանի խնդիր են, ես չեմ վախեցնում՝ չափերդ ճանաչեք, հլա ձեր ուժը նայեք, ձեր տվայտանքները նայեք: Եկել, իշխանությունից խռովում եք: Չեք ուզում, մի քվեարկեք, հլա նայեք սրանց խելքին՝ կա, թե չկա, էդ էլ հարց է: Ժամանակին Ղարաբաղ էիք ծախում, այսօր մեզ եք դավաճաններ ասում: Սա մեր էներգետիկ զորացման աղբյուրն է, մենք անվտանգ ենք դառնում, էդ «բարեկամ երկիր» հասկացողությունը մի քիչ լիրիկական հասկացողություն է, դու տարածաշրջանի ամենաէժան գազն ես ստանում: Հլը դու քո ճիվաղային արտաքինով մտածի՝ էս անկախությունը օդից չի եկել է՜: Արդեն էն հայկական կաղապարային իրավիճակներն են»:
Սահակյանը նաև նկատեց, որ երբ երկու-երեք հոգի քաղաքացիական նախաձեռնողներ են տեսնում, տասնհինգ դրոշով կանգնում են, ասում են՝ սրանք մեր մարդիկ են: Նա խորհուրդ տվեց չխաբել ժողովրդին, որն այսօր գազ պիտի ստանա: ՀՀԿ անդամը նկատեց, որ ընդդիմադիրների ասելով՝ այդ գազը թանկ է, ինքն էլ ասում է՝ տարածաշրջանի ամենաէժան գազն է: Սահակյանը խորհուրդ տվեց մտածել նրանց, ովքեր 37 տոկոս ձայներ ստանալով՝ խաբեցին ժողովրդին: «Ես ձեր մերկությունը լավ եմ տեսել և երբեք չեմ գայթակղվել»,- ասաց նա: