Այսօր լոլիկները հիմնականում հավաքում են խակ վիճակում և մշակում էթիլենով: Այսպես նրանք ավելի լավ տեսք են ունենում և փոխադրելիս չեն փչանում, սակայն կորցնում են համը և բույրը: Գիտնականները, սակայն, գտել են միջոցը, թե ինչպես երկարացնել լոլիկների «թարմ տեսքի» ժամկետը՝ առանց դրանց համին վնասելու: Այս մասին հաղորդում է Current Biology ամսագիրը:
Բանն այն է, որ Մեծ Բրիտանիայում գտնվող John Innes Centre հետազոտական կենտրոնն աճեցրել է մանուշակագույն լոլիկի տեսակ: Ինչպես պարզվել է, պտուղներին մուգ գույն հաղորդող անտոցիանինները խոչընդոտում են դրանց փչանալը: Իսկ քանի որ անտոցիանիններն ուժեղ հակաօքսիդանտներ են, օգտակարությամբ մանուշակագույն լոլիկները գերազանցում են իրենց ցեղակից եղբայրներին:
Այժմ աշխատում են մանուշակագույն ելակ և ազնվամորի ստանալու ուղղությամբ՝ լավ պահպանվելու և օգտակարության համար:
