Ազգային ժողովի «Ելք» խմբակցության պատգամավոր Էդմոն Մարուքյանն օրերս հայտարարել է, որ Հայաստանը պետք է ԵԱՏՄ-ից դուրս գալու գործընթաց սկսի: Ինչպես հայտնի է, պատգամավորի այս հայտարարությանը նախորդել էր ՌԴ Պետդումայի ընդունած նոր օրինագիծը, որի համաձայն՝ Հայաստանի վարորդական իրավունքը Ռուսաստանում չի ճանաչվում։
Նույն օրենքը չի արգելում, սակայն, Ռուսաստանում իրենց երկրների վարորդական իրավունքով աշխատել այն քաղաքացիներին, որոնց հայրենիքում ռուսերենն ունի պետական լեզվի կարգավիճակ:
«Ելք» դաշինքի պատգամավոր Արամ Զ. Սարգսյանից հետաքրքրվեցինք՝ արդյոք կիսո՞ւմ է Մարուքյանի կարծիքը, և հիմա անհրաժե՞շտ է ԵԱՏՄ-ից դուրս գալու գործընթաց սկսել. «Իմ տեսակետը այս հարցում վաղուց և բոլորին հայտնի է։ Ինձ համար միանշանակ է, որ ՀՀ ինքնիշխանության և պետականության կայացման միակ միջոցը նախկին սովետականը հիշեցնող, ձգտող ու նմանակող պորտալարից կտրվելն է և քաղաքակիրթ ու զարգացող երկրների օրինակին հետևելն ու ինտեգրվելը։ Հետևաբար միանշանակ կիսում եմ Էդմոն Մարուքյանի տեսակետը և կարծում, որ ինչքան շուտ ՀՀ իշխանությունները հասկանան և ընդունեն այս, իմ կարծիքով, ակնհայտ իրողությունը, այնքան ավելի կարճ ժամանակ կպահանջվի գոյություն ունեցող և ոչ մի հույս չներշնչող ու չտանող ճահճից դուրս գալու համար»:
Հարցրինք նաև՝ արդյոք դաշինքում այս հարցի շուրջ քննարկում եղե՞լ է, և Մարուքյանն արտահայտել է դաշինքի՞ տեսակետը. «Ինչ վերաբերում է «Ելք» կուսակցությունների դաշինքին, ապա պետք է նշեմ, որ նրա անդամ՝ «Լուսավոր Հայաստան», «Քաղաքացիական պայմանագիր» և «Հանրապետություն» կուսակցությունները դեմ են արտահայտվել ԵԱՏՄ-ին ՀՀ միանալուն, հիմնավորել են դրա ոչ նպատակահարմարությունը, և վերջապես մենք միակ քաղաքական միավորն ենք ԱԺ-ում, որը գաղափարական տարբերություն ունի գործող իշխանությունից և կարծում է, որ Հայաստանը պետք է առաջնորդվի եվրոպական մոդելի պետություն դառնալու ճանապարհով»,- «Առաջին լրատվական»-ի հետ զրույցում ասաց Սարգսյանը:
Մեր դիտարկմանը՝ կան կարծիքներ, որ նման կտրուկ փոփոխությունը կարող է վտանգավոր լինել Հայաստանի համար, պատգամավորն արձագանքեց. «Իմ կարծիքով՝ ամենանպատակահարմար և ընկալելի պահը ԵԱՏՄ-ից դուրս գալու համար անմիջապես ապրիլյան քառօրյա պատերազմից հետո էր, և, ցավոք, մենք այն կորցրինք, որովհետև դա հասկանալի ու ընկալելի կլիներ բոլորին։ Այդ կառույցին անդամակցության ամեն օրը կորսված և վատնված ժամանակ է թե՛ տնտեսական, թե՛ աշխարհաքաղաքական, թե՛ ժողովրդավարական, թե՛ ժողովրդագրական և թե՛ անվտանգության առումներով։ Ռուսաստանը «բիզնես նպատակներով» զենք վաճառել և շարունակում է վաճառել Ադրբեջանին։ Հենց վերջերս Ադրբեջանը ստացավ ՏՈՍ-երի և «Սոնցեպլյոկ»-ների նոր խմբաքանակը, որը նոր սերնդի հարձակողական զենք է, և ի տարբերություն հին մոդելի՝ այս նորը ավելի մեծ հեռահարության ու թիրախների ոչնչացման ճշգրտություն ունի։ Իսկ թե Ադրբեջանը ում է թիրախ համարում ու որտեղ է միտված օգտագործելու այդ զինատեսակը՝ հայտնի է և՛ ռուսներին, և՛ ՀՀ իշխանություններին, և՛ թե ԵԱՏՄ-ից դուրս գալը ժամանակավրեպ ու ոչ նպատակահարմար համարողներին»:
Սարգսյանը հավելում է. «Վստահաբար «Ելք» դաշինքը (և ոչ միայն) շատ-շատ լուրջ պետք է վերաբերվի ու շատ ճշգրիտ անելիքներ ունի այս խնդիրը օրակարգային դարձնելու համար ու, առաջին հերթին, հանրային կարծիք ձևավորելու խնդրում, ինչին էլ միտված են իմ գործընկերների հարցազրույցները, ելույթները և հարցապնդումները ԱԺ-ում»:
Ըստ նրա՝ նման իրավիճակ ձևավորելու արդյունքում է միայն, որ հնարավոր կդառնա գործող իշխանությանը նման գործընթացի մղելը ու անհրաժեշտության դեպքում անգամ հանրային ճնշումներով պարտադրելը:
Լուսանկարը՝ shabat.am-ի
