27-ամյա ամերիկուհի Կասանդրա Դե Պեկոլը ռեկորդային կարճ ժամանակում եղել է աշխարհի բոլոր երկրներում։ Այս մասին հայտնում է Seeker պարբերականը։
Ուղևորությունը, որը սկսվել էր 2015 թվականի հուլիսին, շարունակվել է 18 ամիս և 26 օր։ Այդ ընթացքում նա այցելել է 195 պետություն և երկու համաշխարհային ռեկորդ սահմանել։ Դե Պեկոլը դարձել է պատմության մեջ առաջին կինը, ով եղել է աշխարհի բոլոր երկրներում և առաջին մարդը, ով այդ հանձնարարությունը հաղթահարել է այդքան կարճ ժամանակում։
Նախկին ռեկորդակիրը՝ ամերիկացի պրոֆեսոր Իլի Լյուն, ճանապարհորդության վրա ծախսել է 3 տարի, 3 ամիս և 6 օր։
Կնոջ երթուղու վերջին կետը եղել է Եմենը։
Դե Պեկոլի խոսքով՝ ինքը մանկուց ցանկացել է տեսնել աշխարհը, ծանոթանալ տարբեր մշակույթներին և կրոններին։ Ուղևորությունն արժեցել է ավելի քան 200 հազար դոլար։ Այդ ընթացքում ամերիկուհուն ֆինանսապես աջակցել են իրեն նախկինում անծանոթ մարդիկ։ Նրա խոսքով՝ իր բոլոր հովանավորներին ինքը գտել է արդեն ուղևորության ժամանակ։