Անդրադառնալով դիտարկմանը, որ այս օրերին մամուլը լեցուն է արտահոսքերով այն մասին, որ առաջիկայում ՀՀԿ խորհրդի և ԳՄ նիստում կքննարկվի վարչապետի և մի քանի նախարարների հարցը և հավանաբար կազդարարվի արմատական փոփոխությունների մասին, «Առաջին լրատվական»- ի հետ զրույցում իրավապաշտպան Արթուր Սաքունցը նշեց, որ այդ ամենի հետ կապված հույսեր չունի, որովհետև, նրա խոսքով, ՀՀԿ ԳՄ պալատի ներսում փոխատեղումներ, խոսակցություններ, գուցեև ինտրիգներ են տեղի ունենում, որոնք որևէ առնչություն չունեն մեր իրականութան հետ:
«Ստիպված եմ հիշեցնել հայտնի օդեսացի հրեայի մասին պատմությունը. երբ որ նրան հարցնում են՝ պալիտբյուրոյում փոփոխություններ են տեղի ունենում, դուք ի՞նչ կարծիքի եք, այդ փոփոխությունները արդյունք կունենա՞ն, նա պատասխանում է. «Հայրս հեղափոխությունից առաջ Օդեսայում հասարակաց տուն ուներ, և երբ որ քիչ էր եկամուտ ունենում, հայրս ոչ թե մարմնավաճառների մահճակալներն էր փոխատեղում, այլ փոխում էր մարմնավաճառներին»: Ցավոք այս պատմությունը մեր իրականության հետ առնչություն ունի. մարմնավաճառներին փոխելով՝ հասարակաց տունը մնում է հասարակաց տուն, եկամտի աղբյուրը մնում է նույնը»,- նշեց Ա. Սաքունցը:
Նրա խոսքով՝ ո՛չ ապրիլյան պատերազմից, ո՛չ հուլիսյան իրադարձություններից հետո՝ կապված «Սասնա ծռեր»- ի զիված գործողության հետ, որոնք Հայաստանի արտաքին և ներքին անվտանգության և մարտահրավերների ժայթքում էին, հանրությունը չտեսավ դասեր քաղելու խոսքի տրամաբանական և բովանդակային գործողությունը:
«Չտեսանք պատշաճ քննություն ապրիլյան իրադարձությունների պատճառների վերհանման վերաբերյալ: Այն, ինչ չէր արվել տարիների ընթացքում, փորձեցին հիմա անել՝ ֆինանսական ներհոսքերի, մադկանց էմոցիաների, զգացմունքների հիման վրա կատարել շինարարական, ամրացման աշխատանքներ բաժանարար գծում: Եվ ոչ մեկը չի հարցնում, իսկ ո՞ւր են մինչև հիմա այդ աշխատանքների համար հատկացված ֆինանսական միջոցները: Հիշենք, որ Ս. Սարգսյանը եղել է պաշտպանության նախարար, անվտանգության և ներքին գործերի նախարար, վարչապետ. այսինքն՝ այն պաշտոններն է զբաղեցրել, որոնք առնչվում են նաև արտաքին քաղաքականության և անվտանգության, ինչպես նաև ֆինանսական հոսքերի հետ»,- նշեց իրավապաշտպանը և հավելեց, որ Հայաստանի Հանրապետությունում իրավիճակը հասցվեց այնպիսի փուլի, երբ կատարվեց հարցը զենքով լուծելու քայլ:
Իրավապաշտպանի խոսքով՝ այն փոփոխությունները, որոնց մասին խոսվում է, ընդամենը փոխատեղումներ են պալատի ներսում:
Մանրամասները՝ տեսանյութւմ:
