«Քաղաքացիական պայմանագիր» միավորումն այսօր հայտարարեց կուսակցություն հիմնադրելու մասին։ Այս մասին «Քաղաքացիական պայմանագրի» հիմնադիր համաժողովին ասաց կառավարման խորհրդի անդամ, ԱԺ ՀԱԿ խմբակցության պատգամավոր Նիկոլ Փաշինյանը։
«Կարող է հարց ծագել` ինչու ստեղծել հերթական կուսակցություն, մենք էլ ենք այդ հարցը մեզ տվել: Այսօր չի ստեղծվում հերթական կուսակցություն, այլ այնպիսին, որը երկար ժամանակ չի մնա ընդդիմության շարքերում, այլ կստանձնի պետական իշխանությունը: Մենք պատրաստվում ենք ոչ թե խոստանալ իշխանափոխություն և հետո բացատրել, թե ինչու չեղավ, այլ ներկայացնել, թե մինչ այժմ ինչու են ձախողվել իշխանափոխության բոլոր պրոցեսները», – նշեց նա:
«Մենք ոչ թե միանգամից ասում ենք, որ գնում ենք իշխանափոխության, նախ ցանկանում ենք խորապես հասկանալ, թե ինչու են մինչև հիմա ձախողվել իշխանափոխության բոլոր փորձերը։ Դա հասկանալուց հետո ենք մենք գնալու դեպի իշխանափոխություն։ Երկրում փոփոխություններ անելու համար նախ և առաջ պետք է ինստիտուցիոնալ ընդդիմություն ստեղծել։ Հենց սա էլ մենք անելու ենք»,- ասաց Նիկոլ Փաշինյանը։