«Առաջին լրատվական»-ի տեղեկություններով՝ օրերս 55-ամյա ազատամարտիկ Վարդան Թումանյանին՝ «Ձի Վարդանին», ծեծելով սպանած Ջունգլ մականունով Գևորգ Սարգսյանը և նրա հայրը, ով ևս մասնակցել էր ծեծին, շատ սերտ կապերի մեջ են Երկրապահ կամավորական միության և ԵԿՄ նախագահ գեներալ Մանվել Գրիգորյանի հետ: Ջունգլի հայրը՝ Բաբկեն Սարգսյանը, ևս ԵԿՄ անդամ է, որտեղից էլ ինքն ու որդին բարեկամացել են Մանվել Գրիգորյանի հետ: Ընդ որում, այդ բարեկամությունն այնքան խորն է, որ Ջունգլի ավտոմեքենաների վրա նույն պետհամարանիշն է (45 045), ինչ գեներալ Մանվելինը և Երկրապահի որոշ անդամներինը:
Սպանված ազատամարտիկի քույրը՝ Մարիետա Թումանյանը, «Առաջին լրատվական»-ի հետ զրույցում հաստատեց տեղեկությունը, որ նման կապ նրանց միջև կա:
«Ջունգլի հայրը՝ Բաբկենը, Երկրապահի անդամ է: Կեղծ թուղթ է հանել, կեղծ մեդալներ է տարել ցույց տվել ու այդպես դարձել է Երկրապահի անդամ: Իսկ այս դեպքերից հետո նա գնացել է Երկրապահ, որ իր և որդու համար բնութագիր վերցնի՝ ներկայացնելու նախաքննական մարմնին, սակայն Երկրապահից մերժել են»,- ասաց տիկին Մարիետան:
Տիկին Մարիետան նաև հավելեց, որ Ջունգլի մայրն էլ՝ Անահիտը, ով բախտագուշակություն է անում, ախալքալաքցի է և այս օրերին աջ ու ձախ հայտարարում է, որ պատրաստվում է գործի դնել վիրահայերի միության իր կապերը:
«Նա ամբողջ 7-րդ զանգվածում հայտարարել է, որ այս օրերին պատրաստվում է թռնել Մոսկվա, գնում է վիրահայերի միություն: Ասել է՝ գնալու եմ, երկու չամադան փող բերեմ, դնեմ դատախազի դեմը, ու գործը կփակվի: Նրա խոսքով՝ իր երեխեքը ոչ մի պարագայում չեն նստելու»,- ասաց տիկին Մարիետան:
Նշենք, որ գործով նախաքննությունը շարունակվում է: Ջունգլն ու Սարգիս Ղուկասյանը կալանավորված են: Ծեծին մասնակից երրորդ անձը՝ Վիկտորը, փախուստի մեջ է, որի նկատմամբ հայտարարված է հետախուզում, իսկ Ջունգլի հայրը՝ Բաբկեն Սարգսյանը, ազատության մեջ է՝ ստորագրությամբ չբացակայելու պայմանով:
Տիկին Մարիետայի խոսքով՝ այս օրերին նա և նրանց ընտանիքի մյուս անդամները ազատորեն քայլում են փողոցում, «լպիրշորեն ման են գալիս», որ Վարդանի երեխաները տեսնեն, մի բան ասեն, վեճ սկսվի, հարվածեն, որպեսզի գործն ամբողջությամբ այլ ուղղությամբ շրջվի:
Ինչպես ասաց տիկին Մարիետան, առանց այն էլ դեպքից հետո Վարդանի կինն ու աղջիկը մի քանի անգամ հարցաքննության են կանչվել, առերեսման, և քննիչն անընդհատ հորդորել է լավ հիշել դեպքի մանրամանսրը: «Նա ասում է՝ կարող է մեկն է ծեծել, դուք ասում եք՝ 4 հոգի են եղել: Բայց սա այն դեպքը չէ, որ կինն ու աղջիկը ինչ-որ բան խառնեն, մի բան ավելացնեն կամ պակասեցնեն: Սա այնքան մեծ ողբերգություն է, որ ամեն ինչ պարզից էլ պարզ է՝ ուռճացրած բան չկա»,- եզրափակեց ազատամարտիկի քույրը:
Հ.Գ. Փաստորեն այս դեպքում ոչ միայն դատապարտելի է այն, որ օրը ցերեկով ազատամարտիկի են ծեծելով սպանվում, այլև, որ դա անում է մեկ այլ «ազատամարտիկ»՝ Երկրապահի անդամ և գեներալի մտերիմ: Եվ բնավ զարմանալի չէ, որ դեպքից հետո Երկրապահը ծպտուն չհանեց, ու միայն առանձին ազատամարտիկներ դատապարտեցին կատարվածը:
