«Պատերազմի առաջին օրերից սկսած Թուրքիայում թուրքական ոստիկանությունը շատ խիստ հսկողություն է իրականացնում հայկական եկեղեցու, պատրիարքարանի տարածքում, որպեսզի կանխի հնարավոր բախումները, հայերի նկատմամբ հնարավոր հարձակումները։ Այստեղ բնակվող հայերին վտանգ չի սպառնում, սակայն հիմա ովքեր հնարավորություն ունեն, ինքնաթիռով վերադառնում են Հայաստան։ Ավտոբուսներ դեռ չկան»,- «Առաջին լրատվական»-ի հետ զրույցում ասաց Թուրքիայում բնակվող ՀՀ քաղաքացի Անահիտ Վեզիրյանը։
Նա պատմեց, որ այս օրերին ավտոբուսներ դեռ չկան, սակայն մարդիկ, ովքեր հնարավորություն չունեն ինքնաթիռի տոմս գնելու, հերթագրվում են ավտոբուսով գալու համար՝ անտեսելով բոլոր հնարավոր վտանգները։ Մեր զրուցակցի խոսքով, սակայն, այս ընթացքում լուծվում են նաև տեղափոխման հետ կապված անվտանգության հարցերը։
«Ինքնաթիռի տոմսը 300-360$ սահմաններում է, եթե մոտակա օրերի համար գնվի։ Բայց ոչ բոլորը ունեն դրա հնարավորությունը։ Հայաստանից այստեղ եկածները հիմնականում ոչ բարձր վարձատրվող աշխատանք են անում և չեն կարող իրենց թույլ տալ այդքան թանկ տոմսեր գնել։ Ասում են՝ ավտոբուս կլինի այս ամսվա վերջին, 200 հոգի հերթագրվել են արդեն։ Սպասում ենք։ Կոնկրետ ես ուզում եմ օր առաջ իմ հայրենիքում լինել։ Ես հրեաների տանն եմ աշխատում, ինձ վտանգ չի սպառնում։ Շատ լավ մարդիկ են ինձ հյուրընկալողները, բայց ուզում եմ մեկ ժամ շուտ Հայաստանում լինել»,- ասաց Անահիտ Վեզիրյանը։
Ստամբուլի «Ակօս» շաբաթաթերթի հայկական բաժնի գլխավոր խմբագիր Բագրատ Էստուկյանն էլ նախօրեին «Առաջին լրատվական»-ի հետ զրուցում ասել էր, որ հայերին լուրջ վտանգ չի սպառնում Թուրքիայում։ Պատերազմի սկսվելուց մի քանի օր հետո Թուրքիայում հայկական թաղամասերում մի քանի ցույցեր են եղել ադրբեջանցիների մասնակցությամբ, բայց միայն այդքանը։ Դրանից հետո մինչ օրս որևէ նման միջոցառում, ցույց, հայերի հետ ոչ մի միջադեպ չի եղել։ Նրա խոսքով՝ Հայաստան վերադառնալու ցանկությունը հատկապես մեծ է Հայաստանից աշխատանքային նպատակով Թուրքիա եկած Հայաստանի քաղաքացիների շրջանում։ Նրանք են, որ ուզում են վերադառնալ Հայաստան։ Իսկ տեղացի հայերը, ովքեր ունեն կացության իրավունք կամ արդեն Թուրքիայի քաղաքացի են, նման ցանկություն, կարծես, չունեն։
«Վերջին տարիներին տեղացի հայերի և այստեղի ժողովրդի միջև որոշակի մերձեցում կա։ Երկքաղաքացիության օրենքի ընդունումից հետո շատ պոլսահայեր քաղաքացիություն ստացան։ Այո՛, բոլոր հայերի հեռանկարում էլ հայրենիք վերադառնալու միտք կա, բայց ոչ այս իրավիճակով պայմանավորված»,- ասաց Էստուկյանը։
