Այսօր Հայ ազգային կոնգրեսի ներկայացուցիչ Դավիթ Շահնազարյանը, որը հյուընկալվել էր «Հայացք» ակումբում, նշեց, թե ակնհայտ է, որ սոցիալական իրավիճակը արդեն իր մեջ պարունակում է պայթյունավտանգության տարր, և այսօր Հայաստանի տնտեսական իրավիճակն այնպիսին է, որ մոտ ապագայում, բոլոր վերլուծաբանների, տնտեսագետների կանխատեսումներով, Հայաստանը կանգնելու է լուրջ տնտեսական խնդիրների առջև, մինչդեռ իշխանությունները որևէ կերպ չեն փորձում այդ լարվածությունը թուլացնել:
Գալով հայաստանյան ներքաղաքական իրավիճակին` Դ. Շահնազարյանը նշեց, որ վերջին զարգացումների արդյունքում էապես փոխվել է Հայաստանի ներքաղաքական ներկապնակը: «Ուրվագծվում է մի այսպիսի իրավիճակ. ՀՀԿ-ն` Սերժ Սարգսյանի գլխավորությամբ, ունենալով Արևմուտքի աջակցությունը, փորձում է պահպանել իր իշխող դիրքերը, իսկ Ռոբերտ Քոչարյանը, օգտագործելով իր ահռելի ֆինանսական միջոցները, որոնք ժողովրդից թալանված միջոցներ են, ընդամենը փորձում է ցուցադրել, որ ինքը վայելում է Կրեմլի քաղաքական աջակցությունը: Ամենայն պատասխանատվությամբ հայտարարում եմ, որ բացառված է, որպեսզի Մոսկվան որևէ քաղաքական աջակցություն ցուցաբերի Ռ.Քոչարյանին` հաշվի առնելով այն հսկայական ատելությունը, որը կա մեր հասարակության մեջ նրա նկատմամբ, և հաշվի առնելով, որ նրան սպասում է ամբաստանյալի աթոռը»:
Ստեղծված իրավիճակում միակ ելքը Դ. Շահնազարյանը տեսնում արտահերթ ընտրությունների միջոցով է ազգային համաձայնության հասնելու մեջ. «ՀԱԿ-ը բոլոր խնդիրների լուծումը տեսնում է միայն արտահերթ ընտրությունների միջոցով, միայն դրա արդյունքում կհաջողվի հաստատել ազգային համաձայնություն»:
Պատասխանելով «Առաջին լրատվական»-ի հարցին, թե ՀՀԿ-ԲՀԿ լարված հարաբերությունների արդյունքում, երբ, փաստորեն, Ռ. Քոչարյանը փորձում է ստանալ Կրեմլի աջակցությունը, հնարավո՞ր է մի նոր պալատական հեղաշրջում, Դ. Շահնազարյանն ասաց. «Ռ. Քոչարյանը չի վայելում և երբեք չի վայելի ՌԴ աջակցությունը. նա ընդամենը փորձում է ցույց տալ, թե ունի նման աջակցություն: Ավելին` բացառված է, որ Ռ. Քոչարյանը ունենա որևէ աջակցություն դրսից և հատկապես՝ ՌԴ-ից: Եվ ընդհանրապես, բացառված է Ռ. Քոչարյանի՝ իշխանության վերադառնալու որևէ հնարավարություն»:
«Առաջին լրատվական»-ի հաջորդ հարցին` ներքաղաքական վերոնշյալ զարգացումներում ի՞նչ քայլեր պետք է ձեռնարկի ՀԱԿ-ը, Դ.Շահնազարյանը պատասխանեց. «Հայաստանի ներքաղաքական կայունության երաշխավորը այսօր ՀԱԿ-ն է: Կոնգրեսը մշտապես հենվել և հենվելու է ՀՀ քաղաքացիների վստահության և աջակցության վրա, ինչը վայելել և շարունակելու է վայելել»:
Պատասխանելով լրագրողի հարցին, թե՝ արաբական աշխարհում ժողովրդի ընդվզումը սկսվեց սոցիալական խնդիրներից. հնարավո՞ր է, որ ՀԱԿ-ը մարտավարական փոփոխությունների գնա, Դ.Շահնազարյանը պատասխանեց. «Սոցիալական խնդիրները հաղթահարելու միակ ուղին իշխանափոխությունն է, բոլոր սոցիալական շարժումները, որոնք այսօր ձևավորվել ու ձևավորվում են սոցիալական պահանջներ ներկայացնելով, հաջողության չեն հասնի: Միայն քաղաքական խնդիրներով կարելի է հասնել փոփոխությունների»: