Այսօր իրանական լրատվամիջոցները անակնկալ մի տեղեկություն են տարածել, համաձայն որի՝ Սաուդյան Արաբիան զորքեր է մտցնում Բահրեյն հակակառավարական ելույթները ճնշելու համար: Անշուշտ, սա կարող է սադրանք լինել իրանական իշխանությունների կողմից, քանի որ լուրը տարածել է ինչպես ABNA կրոնական վերնախավին մոտ կանգնած աղբյուրը, այնպես էլ պետական MEHR գործակալությունը:
Ըստ այդ լուրի՝ Բահրեյն կղզի-պետությունը Սաուդյան Արաբիայի հետ կապող կամուրջներից մեկն արագ ազատվում է սովորական քաղաքացիների երթևեկից, որպեսզի արագացվի Սաուդյան Արաբիայի զորքերի մուտքը Բահրեյն: Այս տեղեկությունն այլ աղբյուրներից ճշտել դեռ չհաջողվեց:
Տեղեկացնենք, որ Սաուդյան Արաբիան և Բահրեյնը Պարսից ծոցի չորս այլ պետությունների հետ մեկտեղ Պարսից ծոցի արաբական երկրների համագործակցության խորհրդի անդամ են: Այս կազմակերպությունը, տնտեսական ինտեգրման նպատակներից զատ, ունի նաև պաշտպանական գործառույթ, և գուցե վերոնշյալ գործողությունը կատարվում է հենց այդ կազմակերպության շրջանակներում ստորագրված համաձայնագրերի հիման վրա:
Սակայն միայն իրանական աղբյուրների կողմից այս տեղեկության տարածումը հանգեցնում է մի եզրակացության, որ Իրանը փորձում է լուրջ բախումներ հրահրել տարածաշրջանում: Հիշեցնենք, որ թեպետ Բահրեյնի իշխանական վերնախավը դավանում է սուննի իսլամ, սակայն բնակչության ճնշող մեծամասնությունը շիաներ են, և այս հանգամանքը Իրանը բազմիցս է օգտագործել: Սխալ տեղեկություն տարածելով՝ Իրանը կարող է խուճապ և նոր բախումներ հրահրել Բահրեյնում:
Եթե ընդունենք, որ իրանական լրատվամիջոցների տարածված լուրը համապատասխանում է իրականությանը, ապա Իրանն այս դեպքում էլ կարող միջամտել Բահրեյնի ներքին գործերին, և այդ պարագայում պատերազմն անխուսափելի է: Բանն այն է, որ Իրանն ու Սաուդյան Արաբիան տարածաշրջանի հիմնական մրցակից տերություններն են: Իսկ մեկի առաջխաղացումն այս տարածաշրջանում չի կարող չառաջացնել մյուսի անհանգստությունը:
Այս կոնտեքստում անհրաժեշտ է նշել, որ Բահրեյնում է գտնվում ԱՄՆ ռազմածովային 5-րդ նավատորմի բազան, որը մի շարք կարևոր հանգույցներ է վերահսկում այս տարածաշրջանում: Անհրաժեշտ է ուղղակի սպասել այս տեղեկության հետագա հաստատմանը կամ հերքմանը` զարգացումների ընթացքը ճիշտ պատկերացնելու համար:
