ԱՄՆ նախագահի թեկնածու, հանրապետական Միթ Ռոմնին քննադատել է Մեծ Բրիտանիային` կասկած հայտնելով, որ երկիրը պատրաստ է Օլիմպիադային: Այս մասին հաղորդում է France 24-ը:
«Իրականում դժվար է պատկերացնել, թե ինչով այս ամենը կավարտվի»,- հայտարարել է Ռոմնին Լոնդոն կատարած այցի ընթացքում լրագրողների հետ հանդիպման ժամանակ:
«Անվտանգության մի քանի մասնավոր ընկերությունները, որոնք պետք է ապահովեն խաղերի անվտանգությունը, բավարար քանակությամբ աշխատակիցներ չունեն: Բացի այդ, այդ օրերին հնարավոր գործադուլների մասին են հայտարարել միգրացիոն և մաքսային ծառայությունների աշխատակիցները: Այս ամենը, իհարկե, ուրախալի փաստեր չեն»,- մտահոգություն է հայտնել Ռոմնին:
Ռոմնին կասկածել է նաև մարզական խոշոր իրադարձության նկատմամբ բրիտանացիների անկեղծությանը: «Օլիմպիադան կդառնա՞ այն առիթը, որի համար նրանք կմիավորվեն ու միասին կնշեն: Հարցի պատասխանը մենք կիմանանք միայն այն բանից հետո, երբ մրցումները կսկսվեն»,- նշել է ԱՄՆ նախագահի թեկնածուն:
Ռոմնին Օլիմպիադա կազմակերպելու մեծ փորձ ունի: 2002 թվականին նա դժվարին պահին Սոլթ-Լեյք-Սիթիում գլխավորել է Օլիմպիադայի կազմկոմիտեն և կարողացել է Կոնգրեսից հավելյալ ֆինանսավորում ստանալ: