Այսօր Երևանի պետական համալսարանում կազմակերպվել էր միջազգային գիտաժողով` «Իրանի Իսլամական հեղափոխությունը համեմատական կոնտեքստում» թեմայով: Գիտաժողովը կազմակերպվել է ԵՊՀ-ի և ՀՀ-ում Իրանի դեսպանատան կողմից և նվիրվում է իսլամական հեղափոխության 32-րդ տարելիցին: Գիտաժողովին զեկույցներով հանդես եկան ՀՀ-ում ԻԻՀ դեսպան Սեյեդ Ալի Սաղայիանը, ԵՊՀ դասախոսներ Գարիկ Քեռյանը, Վահան Բայբուրդյանը, ինչպես նաև քաղաքագետ Ռիչարդ Կիրակոսյանը:
«Քաղաքական կանխատեսումներ անելը անշնորհակալ գործ է, քանզի երբեմն դրանք չեն իրականանում: Սակայն այժմ արդիական է անդրադառնալ 1979 թ. Իրանում տեղի ունեցած հեղափոխությանը, խոսել այն իրադարձությունների մասին, որոնք հանգեցրին դրան և դեր ունեցան ամբողջ աշխարհի զարգացումների վրա»,- ողջունեով հյուրերին` ասաց ԵՊՀ ռեկտոր Արամ Սիմոնյանը:
Դեսպան Սեյեդ Ալի Սաղայիանը իսլամական հեղափոխության մասին զեկույցում նշեց. «Իրանում հեղափոխությունը իր տեսակի մեջ եզակի է, այն չի կազմակերպվել մի մարդու կողմից: Սակայն ընդհանրությունը այլ հեղափոխությունների հետ այն է, որ դրա առանցքը մարդն է: Այս հեղափոխությունը կոչ էր անում թոթափել բռնության լուծը ամբողջ աշխարհի ժողովուրդներին, ոչ միայն Իրանի բնակչությանը: Այս է պատճառը, որ այն ընդունվեց ու ողջունվեց նաև քրիստոնյաների կողմից»: