Ինչպես հաղորդում է Associated Press գործակալությունը, իսպանական Մալյորկա կղզում ձերբակալվել է հայտնի իտալացի փաստաբան Ջովանի դի Ստեֆանոն, որը մասնակցել է վերջին շրջանում աշխարհում մեծ աղմուկ հանած մի քանի դատական գործերի: Նրա ձերբակալության պատճառ է հանդիսացել բրիտանական դատախազության կողմից ներկայացված մեղադրանքը: Բրիտանական իրավապահները Դի Ստեֆանոյին կասկածում են խաբեբայության մեջ:
Թե կոնկրետ ինչ գործով է նա մեղադրվում խաբեյության մեջ՝ հայտնի չէ, սակայն ձերբակալությունից հետո նրա առողջական վիճակը կտրուկ վատացել է, և նրան հոսպիտալացրել են:
Դի Ստեֆանոն հայտնի է որպես Իրաքի նախկին նախագահ Սադամ Հուսեյնի, նրա վարչակազմի կարկառուն ներկայացուցիչներ Տարիկ Ազիզի և «քիմիական» Ալիի փաստաբան: Նա եղել է նաև Հարավսլավիայի նախկին նախագահ Սլոբոդան Միլոշևիչի փաստաբանը Հաագայի դատավարության ժամանակ: Իսկ այս տարի հայտնի էր դարձել, որ նա ստանձնել է մի քանի սպանություններում մեղադրվող Չարլզ Մենսոնի պաշտպանի պարտականությունները: