«Դժվար է ասել, թե ինչպիսի զարգացումների հիմք կհանդիսանա այս ամենը: Կարող է իրավիճակը տանել երկփեղկման, կարող է հակառակ զարգացումներ լինեն և տանի միաձուլման, և ներկայիս իշխանության բազիսային ուժը պահպանի ամբողջականությունը»,- ներկոալիցիոն զարգացումներին անդրադառնալով` «Առաջին լրատվականի» հետ զրույցում կարծիք հայտնեց ԱԺ պատգամավոր Վարդան Խաչատրյանը:
Խաչատրյանի գնահատմամբ, ամեն ինչ կախված է նրանից, թե ինչպիսի զարգացումներ են սպասվում Հայաստանում. «Տնտեսական առումով որևէ զարգացում չի սպասվում, ներքին քաղաքական առումով վերջնական հաշտեցում հաստատ տեղի չի ունենա»:
Պատգամավորի գնահատմամբ, արտաքին գործոնը գնալով մեծանում է` կապված թե՛ ԼՂ խնդրի ներկայիս իրավիճակի հետ, թե՛ համաշխարհային այն գործընթացների, որոնք շոշափել են համայն մարդկության ներկայիս իրավիճակը.
«Տեղի է ունենում տասնամյակներ շարունակ կայացած և կարծրացած հարաբերությունների փլուզում: Չի բացառվում, որ արաբական աշխարհում ընթացող պրոցեսները ստեղծեն անկայունության գոտի, որը նաև կպարուրի Հայաստանը»:
Խաչատրյանի գնահատմամբ, ամերիկյան տնտեսության վերականգնումը ներկայիս փուլում չի ենթադրում շռայլ օգնություններ այն ռեժիմներին, որոնց տասնամյակներով կարողացել են կերակրել և ստեղծել հասարակական կայունություն.
«Կամենում ենք, թե ոչ, տնտեսական բազիսի փոփոխությունից քաղաքականությունը այսօր ևս տեղաշարժվել է»:
