Մինչ մեր քաղաքագետներն ու իշխանությունները հրճվում են տարատեսակ վերլուծական կենտրոնների հուսադրող հրապարակումներով` դա որակելով որպես դիվանագիտական ճկուն քաղաքականության հետևանք, ԱՄՆ նախագահը որոշել է այս տարի Սենատից ավելի քիչ գումար խնդրել Հայաստանի համար` որպես ռազմական օգնություն, քան Ադրբեջանի։ Եթե թվերով ներկայացնելու լինենք, Հայաստանին նախատեսվում է տրամադրել 3,45 մլն դոլարի օգնություն, ինչը 450 հազար դոլարով պակաս է Ադրբեջանին տրվելիք օգնության չափից։
Հիշեցնենք, որ անցյալ տարի ԱՄՆ-ն որոշել էր պահպանել Հայաստանին ու Ադրբեջանին հատկացվող ռազմական օգնության հավասարությունը` յուրաքանչյուր կողմին հատկացնելով 3,5 մլն դոլար։ Տրամաբանական հարց է ծագում` ինչո՞ւ հանկարծ ԱՄՆ նախագահը որոշեց խախտել հավասարակշռությունը` առավելություն տալով մեր հակառակորդին։
Անցյալ տարի օգոստոսին ՀՀ նախագահ Սերժ Սարգսյանն ու ՌԴ նախագահ Դմիտրի Մեդվեդևը ստորագրեցին «Հայաստանի Հանրապետության տարածքում ռուսաստանյան ռազմակայանի մասին» պայմանագիրը, որով նախատեսվում է ռուսական ռազմակայանի տեղակայման ժամկետի երկարաձգում` 49 տարի ժամկետով։ Դեռ այն ժամանակ զարմանալի էր ԱՄՆ պաշտոնական հանդուրժողական դիրքորոշումը։
«Մենք գտնում ենք, որ դա Հայաստանի և Ռուսաստանի երկկողմ հարաբերություններին վերաբերող հարց է: ԱՄՆ-ն ամուր գործընկերային հարաբերություններ ունի Հայաստանի հետ, և մենք ակնկալում ենք, որ դա կշարունակվի: Ռուսաստանն էլ ԵԱՀԿ Մինսկի խմբի անդամ է և դրանում կառուցողական դերակատարում ունի»,- խնդրո առնչությամբ հայտարարել էր ԱՄՆ Պետդեպարտամենտի մամլո ծառայության ղեկավար Մարկ Թոները։
Ու թեև դեռևս այն ժամանակ բազմաթիվ քաղաքագետներ ու քաղաքական գործիչներ նշում էին, որ վերը բերված խոսքերը չեն արտահայտում ԱՄՆ իրական դիրքորոշումը ու հայ-ռուսական պայմանագրի ստորագրումը անհետևանք չի մնա, իշխանական քարոզչամեքենան շարունակում էր հրճվանքով ցիտել Մարկ Թոներին։
Ռազմական օգնության հավասարակշռության խախտման հետ կապված այսօր հայտարարություն է տարածել ԱՄՆ Հայ դատի հանձնախումբը, որում, մասնավորապես, ասված է. «Մենք շատ անհանգստացած ենք, որ ռազմական օգնության տեսանկյունից նախագահի հայտը կշեռքի նժարը թեքում է Բաքվի կողմը, ինչն էլ նոր պատերազմ սկսելու մասին Ադրբեջանի առաջնորդների սպառնալիքների ֆոնին կթուլացնի Լեռնային Ղարաբաղի խնդրի խաղաղ կարգավորման գործընթացը»։
Նշենք, որ նախատեսվում է դադարեցնել նաև Հայաստանին հատկացվող օգնությունը Child Survival assistance և Global Health ծրագրերի շրջանակում, որն անցյալ տարի կազմել է 400.000 դոլար։
