Այսօր, բացի «Միլան»-«Տոտենհեմ» խաղից, կկայանա նաև «Վալենսիա»-«Շալկե» հանդիպումը:
Այս թիմերը միմյանց հանդիպել են 4 անգամ: 1996/97 մրցաշրջանում ՈւԵՖԱ-ի գավաթի խաղարկության քառորդ եզրափակիչի Գելզենկիրխենում կայացած հանդիպումն ավարտվել է տանտերերի հաղթանակով` 2:0 հաշվով, պատասխան խաղում գրանցվել է ոչ-ոքի` 1:1:
2007/08 մրցաշրջանի Չեմպիոնների լիգայի խաղարկության խմբային փուլում «Մեստալիա»-ում կայացած խաղում նույնպես գրանցվեց ոչ-ոքի արդյունք` 0:0, իսկ Գերմանիայում հաղթեցին «չղջիկներ»-ը` 0:1:
Թիմերն իրենց առաջնություններում.
«Վալենսիա»-ն Իսպանիայի առաջնության վերջին տուրում կամային հաղթանակ տարավ «Ատլետիկո»-ի նկատմամբ, իսկ «Վիլյառեալ»-ի կիրակնօրյա պարտությունից հետո արդեն վստահորեն զբաղեցնում է 3-րդ հորիզոնականը:
«Շալկե»-ն, ի տարբերություն մրցաշրջանի սկզբի, արդեն բավականին կայուն խաղ է ցուցադրում, բայց հաջորդ մրցաշրջանում հաստատ չի մասնակցի Չեմպիոնների լիգայի խաղարկությանը և կփորձի այս խաղարկությունում ինչքան հնարավոր է առաջ գնալ:
Մարզիչների կարծիքները.
Ունայ Էմերի. «Մենք այժմ փորձում ենք չմտածել արդյունքի մասին, այլ ցանկանում ենք գեղեցիկ խաղ ցուցադրել: Ողջ դիմակայության հիմնական խնդիրը անհատական և կոլեկտիվ խնդիրների ճիշտ լուծումն է»:
Ֆելիքս Մագատ. «Մեզ ուժեղ մրցակից է բաժին ընկել: «Վալենսիա»-ն Իսպանիայի առաջնության երրորդ թիմն է և հրաշալի հանդես եկավ Չեմպիոնների լիգայի խմբային փուլում: Շատ կարևոր է այսօր դառնալ գոլի հեղինակ, որ պատասխան խաղում մեզ վստահ զգանք»:
Թիմերի նախնական կազմերն ունեն հետևյալ տեսքը.
«Վալենսիա»` Գուաիտա, Միգել, Նավարո, Կոշտա, Մատյ, Խոակին, Մադուրո, Բանեգո, Կոստա, Ադուրից, Սոլդադո:
«Շալկե»` Նոյեր, Ուցիդա, Հևեդես, Մետսելդեր, Շմիթտս, Կլյուգե, Աննան, Ֆարֆան, Հուրադո, Ռաուլ, Հունտելաար:
Խաղերի ուղիղ հեռարձակումը օնլայն ռեժիմով կարող եք դիտել «Առաջին լրատվականում»:
