Այսօր մեկնարկում է Չեմպիոնների լիգայի փլեյ-օֆֆ փուլը: Առաջին խաղային օրը կկայանան «Միլան»-«Տոտենհեմ» և «Վալենսիա»-«Շալկե» հանդիպումները:
«Միլան»-«Տոտենհեմ»
Մինչ այս թիմերը հանդիպել են երկու անգամ` ՈւԵՖԱ-ի գավաթի խաղարկության կիսաեզրափակիչում: Միլանում կայացած հանդիպումն ավարտվել է ոչ-ոքի` 1:1 հաշվով, իսկ Անգլիայում տանտերերը հաղթել են 2:1 հաշվով:
Թիմերն իրենց առաջնություններում.
Իտալիայի առաջնությունում «Միլան»-ը վերջին տարիներին առաջին անգամ չեմպիոն դառնալու լուրջ հնարավորություն ունի: Առաջնության երկու երրորդն արդեն հետևում է, և «Միլան»-ը երեք միավորով գերազանցում է երկրորդ տեղում ընթացող «Նապոլի»-ին: Ալեգրիի սաները վերջին հանդիպումներում այնքան էլ վստահ չեն գործում, բայց չի կարելի ասել թե նրանք լավ մարզավիճակում չեն:
«Տոտենհեմ»-ին հաջողվում է պահպանել անցյալ տարվա դիրքը անգլիական պրեմիեր լիգայում. Ռեդնափի սաները կրկին 4-րդ տեղում են ընթանում: Փետրվարին «Տոտենհեմ»-ը երեք հանդիպում է անցկացրել և տարել երեք հաղթանակ, ինչը խոսում է «խթաններ»-ի գերազանց մարզավիճակի մասին:
Խաղից առաջ իրենց կարծիքներն են հայտնել մարզիչները.
Մասիմիլիանո Ալեգրի. «Մրցաշարին մասնակցում են Եվրոպայի լավագույն թիմերը: Այս փուլից սկսած մենք այլևս սխալվելու իրավունք չունենք: Վերջին երկու տարիներին «Միլան»-ին դուրս են թողել հենց անգլիական թիմերը, այնպես որ հարկավոր է ուշադիր լինել: Բայց վիճակագրությունն ինձ համար կարևոր չէ: Կարծում եմ, որ մենք քառորդ եզրափակիչ դուրս գալու լավ հնարավորություններ ունենք: Տարբերություն չկա կխաղա արդյոք Բեյլը թե ոչ. «Տոտենհեմ»-ն առանց նրա էլ է շատ ուժեղ»:
Հարի Ռեդնափ. «Մենք ցանկանում ենք հաղթել «Սան-Սիրո»-ում, շատ կարևոր է դրական արդյունքի հասնելը: Այս մրցաշրջանում «Տոտենհեմ»-ը բոլորովին այլ մակարդակի ֆուտբոլ է ցուցադրում: «Միլան»-ը հրաշալի թիմ է, բայց մենք նունպես հրաշալի ենք»:
Թիմերի նախնական կազմերն ունեն հետևյալ տեսքը.
«Միլան»` Աբիատի, Աբատե, Նեստա, Յեպես, Անտոնինի, Ֆլամինի, Սիլվա, Գատուզո, Զեեդորֆ, Իբրահիմովիչ, Ռոբինիո:
«Տոտենհեմ»` Գոմես, Չոռլուկա, Դոուսոն, Գալլաս, Ասու-Էկոտո, Լենոն, Պալասիոս, Կռանչար, Պիենար, Վան դեր Վաարտ, Քրաուչ:
Խաղերի ուղիղ հեռարձակումը օնլայն ռեժիմով կարող եք դիտել «Առաջին լրատվականում»:
