Արցախի նախագահի ընտրություններում պարտություն կրած Վիտալի Բալասանյանի օգնական Հայկ Խանումյանն այսօր լրագրողների հետ հանդիպմանը կոչ արեց Հայաստանի պատգամավորներին չգործուղել Արցախ:
«Հայաստանը թող փող չտա գործուղումների համար և պատգամավորներին Արցախ չուղարկի: Գալիս են էնտեղ, քեֆ են անում, նվերներ են ստանում, հետ են գալիս: Նրանցից ոչ մեկը չհանդիպեց նախագահի թեկնածուների հետ: Չգիտենք՝ ինչ արեցին ընտրությունների ժամանակ: Օրինակ՝ Մհեր Շահգելդյանը քաղաքագետ ա, գոնե քաղաքագետին պիտի հետաքրքրեր՝ էս ի՞նչ ա կատարվում ձեր մոտ: Գուցե այլընտրանքային կարծիք կլսեին, բացի իշխանության հետ հանդիպումից, ուրիշ թեկնածուների հետ կհանդիպեին: Ձեր փողերն այս մարդիկ մսխում են, հարգելի հարկատուներ»,- նշեց նա:
Ըստ Խանումյանի՝ մյուս երկրների օրենսդիրները Արցախում հանդիպել են նախագահի բոլոր թեկնածուների հետ, իսկ Հայաստանի պատգամավորները՝ ոչ: Նա նկատեց, որ Հայաստանի օրենսդիրների համար Արցախը միայն նախագահ Բակո Սահակյանն ու վարչապետ Արայիկ Հարությունյանն են:
Հայկ Խանումյանը նաև նշեց, որ Արցախը հայ պատգամավորների համար «Արմենիա» հյուրանոցի տեռասն է»: Ըստ նրա՝ այսօր Հայաստանի խորհրդարանում տարածք հանձող պատգամավորների թիվը շեշտակի աճել է:
«Հայաստանի ներկայիս խորհրդարանը Արցախի համար լուրջ մտահոգության առարկա է: ՀԱԿ-ի, Հանրապետականի, «Օրինաց երկիր»-ի կամ չգիտեմ «Ազատ դեմոկրատ»-ների կարծիքների մեջ Ղարաբաղի հարցը չկա: Ինձ չի հետաքրքրում՝ էստեղ ինչ են անում, իրար կոկորդ են կրծում, մեկը ազատական ա, մյուսը՝ պահպանողական: Արցախի հարցում սրանք բոլորը տարածք զիջող են»,- ասաց նա:
