Ռոման «Մատադոր» Վարդանյան: Այս անունը դեռ շատ ենք լսելու:
19-ամյա հայ բռնցքամարտիկ Ռոման Վարդանյանը, որը բնակվում է Իսպանիայում, արդեն հասցրել է մի շարք հաղթանակներ տոնել և մեծ ճանաչում ձեռք բերել Պիրենեյան թերակղզում ու դրա սահմաններից դուրս: Հուլիսի 19-ին Ռոմանը տոնեց իր հերթական հաղթանակը պրոֆեսիոնալ բռնցքամարտում` Մադրիդում տեղի ունեցած մենամարտի առաջին ռաունդում նոկաուտի ենթարկելով հակառակորդին: Ռոմանը 26 մենամարտից հետո պարտություն չի կրել:
«Առաջին լրատվական»-ի հետ զրույցում Վարդանյանը նշեց, որ պատրաստվում է ևս մեկ մրցաշարի, որին կմասնակցեն հանրաճանաչ և հզոր բռնցքամարտիկներ:
«Մադրիդում տոնեցի հերթական հաղթանակս պրոֆեսիոնալ ռինգում: 26 մենամարտից հետո դեռ պարտություն չեմ կրել:
Մեկ շաբաթից մասնակցելու եմ ևս մեկ կարևոր մրցաշարի, որտեղ հավաքվում են հանրաճանաչ և հզոր բռնցքամարտիկներ: Իմ քաշային կարգում առաջինն եմ Իսպանիայում: Ժամանակ առ ժամանակ մրցակիցներ ենք հրավիրում արտերկրից, սակայն նրանք ոչ միշտ են համաձայնում»:
Հավելենք, որ Ռոմանը հանդես է գալիս Հայաստանի դրոշի ներքո: