Դեռևս պարզ չէ, թե քանի թեկնածու կառաջադրվի Գյումրիի քաղաքապետի ընտրություններում: Թեև ՀՀԿ «դաբրոյով» ԲՀԿ-ն արդեն առաջադրել է Գյումրիից պատգամավոր ընտրված Սամվել Բալասանյանի թեկնածությունը, սակայն գյումրեցիները հիշեցնում են, որ պետք չէ առանձնապես մեծ հույսեր կապել ԱԺ ընտրություններում հանրապետության երկրորդ քաղաքում ԲՀԿ-ի օգտին ստացված մեծ թվով ձայների հետ: Հիշեցնենք, որ ԱԺ ընտրություններում ԲՀԿ-ն զգալի առավելությամբ հաղթանակ տարավ ՀՀԿ-ի նկատմամբ: ՀՀԿ-ի օգտին քաղաքում քվեարկել էր 14 500 մարդ, իսկ ԲՀԿ-ի օգտին` 26 000: Արդյունքում ՀՀԿ թեկնածու Արման Սահակյանը պարտվեց ԲՀԿ թեկնածու Մարտուն Գրիգորյանին: Գյումրիի լրագրողների «Ասպարեզ» ակումբի նախագահ Լևոն Բարսեղյանը «Առաջին լրատվական»-ի հետ զրույցում հիշեցրեց, որ գյումրեցիները միամիտ չեն և չեն առաջնորդվում տևական հայրենասիրության նեղ ընկալմամբ: Գյումրեցին առաջին հերթին կատարած աշխատանքն է գնահատում և դրանով առաջնորդվելով՝ գնում ընտրության: Սամվել Բալասանյանի հաղթելու հնարավորություններիի մասին դեռ վաղ է խոսել: Ըստ Լևոն Բարսեղյանի` պետք է առաջին հերթին տեսնել, թե ովքեր են Բալասանյանի մրցակիցները:
«Եթե գործող քաղաքապետ Վարդան Ղուկասյանն է մրցում Սամվել Բալասանյանի հետ, շատ դժվար է ասել, թե ով կհաղթի: Բայց միաժամանակ շատ են լուրերը, որ Վարդան Ղուկասյանն այլևս չի առաջադրվելու: Ամենայն հավանականությամբ թեկնածուներ կլինեն նաև ՀՅԴ-ից, ՀԱԿ-ից ու Ժառանգությունից, բայց նրանք հիմնական մրցակիցներ չեն լինի»,- նշեց Լևոն Բարսեղյանը: Ըստ նրա` այն, որ խորհրդարանական ընտրություններում ԲՀԿ-ն քաղաքում մեծ թվով ձայներ է հավաքել, դեռևս չի նշանակում, որ այդ ձայները քաղաքապետի ընտրություններում միանգամից կանցնեն Սամվել Բալասանյանին:
«Ավտոմատ ձայների անցում չի կարող կատարվել, որովհետև այստեղ ուրիշ մակարդակի խոսակցություն է. տեղական ընտրությունների ժամանակ մարդիկ ընտրելիս շատ ավելի մտահոգ են լինում, քան հանրապետական ընտրությունների ժամանակ»,- նշեց նա: Լևոն Բարսեղյանի խոսքով` չի կարելի անտեսել նաև Գյումրիի 34-րդ ընտրատարածքում ՀՀԿ թեկնածու Արման Սահակյանին պարտության մատնած Մարտուն Գրիգորյանի գործոնը: Խորհրդարանական ընտրություններում ԲՀԿ-ի հաղթանակի ապահովման գործում էական դերակատարություն է ունեցել հենց Մարտուն Գրիգորյանը, ոչ թե Սամվել Բալասանյանը: Հիմա, երբ ԲՀԿ-ն որոշել է Սամել Բալասանյանի թեկնածությունն առաջադրել, ոչ թե Մարտուն Գրիգորյանինը, հայտնի չէ` Մարտուն Գրիգորյանը կսատարի Սամվել Բալասանյանին, թե ոչ: Լևոն Բարսեղյանի խոսքով` միանշանակ չի կարելի ասել, թե Մարտուն Գրիգորյանին խորհրդարանական ընտրություններում ձայներ տված մարդիկ քաղաքապետի ընտրություններում ձայն կտան ԲՀԿ-ական Սամել Բալասանյանին: «ԲՀԿ-ի հաղթանակն այստեղ մեծամասամբ տեղի է ունեցել Մարտուն Գրիգորյանի աշխատանքի շնորհիվ: Եվ երբ նրան զրկում են քաղաքապետի թեկնածութուն դնելու հնարավությունից, ես կասկածում եմ, որ այդ պատգամավորն իր համակարգման ռեսուրսներն ի նպաստ Սամվել Բալասանյանի հաղթանակի կներդնի: Շատ եմ կասկածում, կարծում եմ, որ նա չի կարող ոչ մի կերպ օգնել Սամվել Բալասանյանին: Բայց եթե Մարտուն Գրիգորյանը, ով նաև ԲՀԿ Շիրակի մարզային կառույցի ղեկավարն է, լիովին ձեռնամուխ լինի Սամվել Բալասանյանին սատարելու գործին, կարելի է ասել, որ Սամվել Բալասանյանը հաստատ կհաղթի, եթե նրա հիմնական մրցակիցը լինի Վարդան Ղուկասյանը»,- նշեց Լևոն Բարսեղյանը:
Նրա խոսքով` քաղաքապետից ավելի կարևոր է Գյումրիի ավագանու ձևավորման հարցը: «Քաղաքը մերն է» նախաձեռնության անդամները, որոնց թվում է նաև Լևոն Բարսեղյանը, քայլեր են ձեռնարկում հզոր ավագանի ձևավորելու համար:
Ըստ Բարսեղյանի` կապ չունի թեկնածուն գյումրեցի է, թե ոչ: Չի բացառվում, որ գյումրեցին ընտրի նաև ծնունդով ոչ գյումրեցի թեկնածուի: «Ամեն ինչ կապված է նրանից, թե թեկնածուն ինչ ծրագրեր կունենա: Եթե դրանք լինեն իրական ծրագրեր և ոչ թե հեքիաթային, եթե մարդն իր կենսագրությամբ ու վարքով գյումրեցիներին ընդունելի լինի, կարող են այդ թեկնածուին ընտրել»,- նշեց նա:
Գյուրեցի ազգագրագետ Արտաշես Բոյաջյանը, հաշվի առնելով այն հանգամանքը, որ Սամվել Բալասանյանն ԱԺ ընտրություններում բավականին ձայներ է հավաքել, կարծում է, որ քաղաքապետի ընտրություններում նույնպես հաջողություններ կունենա: «Բայց այսօրվա հեղհեղուկ պայմաններում կարող է վաղն այնպիսի թեկնածու առաջադրվի, որ իրավիճակը 180 աստիճանով շրջվի, և մարդկանց մեծամասությունը ձայնը տա ոչ թե ԲՀԿ-ին, այլ ՀՀԿ-ին: Դուք լավ գիտեք, որ մեր քաղաքական համակարգում ամեն ինչ փոփոխական է»,- ասաց ազգագրագետը:
Առաջադրվելու դեպքում հաղթելու շատ քիչ հնարավորություններ կունենա գործող քաղաքապետ Վարդան Ղուկասյանը, եթե ՀՀԿ վերնախավը նրան չսատարի: Արտաշես Բոյաջյանի խոսքով` եթե ՀՀԿ-ն էլ թեկնածու առաջադրի քաղաքապետի ընտրություններում, թեժ պայքար կընթանա, և այս պարագայում դժվար է կանխատեսումներ անելը:
Միաժամանակ, ազգագրագետն ուշադրություն է հրավիրում այն հանգամանքի վրա, որ քաղաքապետի ու խորհրդարանական ընտրությունները չպետք է միևնույն հարթության վրա դիտարկել: Քաղաքապետի ընտրություններում մարդիկ ավելի զգուշավոր են: «Բայց կա մեկ «բայց». բոլորս էլ գիտենք, թե ընտրություններն ինչպես են անցկացվում: Կարևոր չէ, թե ժողովուրդն ում է ձայն տվել, կարևոր է, թե ինչպես կհաշվեն: Ձայները հաշվում են այնպես, ինչպես իրենց ձեռնտու է»,- նկատեց Բոյաջյանը: Նա ընդգծեց, որ Գյումրիին այսօր անհրաժեշտ է համարձակ և կառավարությունից պահանջող քաղաքապետ, ով կկարողանա գումարներ բերել քաղաք և լուծել տարիներ շարունակ կուտակված սոցիալական լուրջ խնդիրները:
«Գյումրին անտեսված է իշխանությունների կողմից, մարդկանց սոցիալական վիճակը շատ ծանր է: Տղամարդկանց մեծ մասն արտագնա աշխատանքի են մեկնել, աշխատատեղեր չկան, եղած աշխատավարձերն էլ շատ ցածր են»,- նշեց նա:
Հիշեցնենք, որ Գյումրիի քաղաքապետ Վարդան Ղուկասյանը հրաժարվել է ՀՀԿ-ի Շիրակի մարզային խորհրդի ղեկավարի պաշտոնից: Այս պարագայում գրեթե անհնար է դառնում այն տարբերակը, որ ՀՀԿ վերնախավը կսատարի Վարդան Ղուկասյանի թեկնածությունը, եթե նա որոշի առաջադրվել քաղաքապետի ընտրություններում: Լուրեր կան, որ ՀՀԿ վերնախավը դժգոհ է Վարդան Ղուկասյանի կատարած աշխատանքից: Ասում են, որ Սերժ Սարգսյանին հատկապես դուր չի եկել այն հանգամանքը, որ խորհրդարանական ընտրություններում Գյումրիում ՀՀԿ-ն պարտություն է կրել:
