Այսօր Ազգային գրադարանում տեղի ունեցավ հանդիպում թուրք հրատարակիչ Ռազըպ Զարաքոլուի հետ: Հանդիպման ընթացքում գրադարանի տնօրեն Դավիթ Սարգսյանը Զարաքոլուին շնորհեց Ազգային գրադարանի շնորհակալագիրը`մարդու իրավունքների և Հայ Դատի պաշտպանության, Հայոց ցեղասպանության դատապարտման և հումանիտար արժեքներին հավատարմության համար:
«Ինձ համար սա ամենանվիրական մրցանակն է, որ երբևէ ստացել եմ: Ես դեռ դրա իրավունքը չունեի: Ցեղասպանության մասին հրատարակությունների համար ես մեկ այլ մրցանակ եմ ստացել նաև Սարագոսայում, սակայն Երևանում նման պատվի արժանանալը լրիվ այլ բան է»,- մրցանակը ստանալով՝ ասաց Ռազըպ Զարաքոլուն:
Դավիթ Սարգսյանը հյուրին նվիրեց նաև Լեռնային Ղարաբաղի մասին երկու գիրք: Շնոհակալություն հայտնելով ընդունելության համար` Ռազըպ Զարաքոլուն Ազգային գրադարանին նվիրեց Թեո Դիքի՝ Ցեղասպանությունից մազապուրծ կանանց մասին պատմող գիրքը, որը եղել է Զարաքոլու ընկեր Հրանտ Դինքի սեղանի գիրքը:
Ռազըպ Զարաքոլուի ղեկավարած «Բելգե» հրատարակչությունն է տպագրել Վերժինե Սվազյանի «Հայոց ցեղասպանությունն ու հավաքական հիշողությունը»` թուրքերենով, Վահագն Տատրյանի «Հայոց ցեղասպանությունը` Եռյակ դաշինքի պետական արխիվային վավերագրերում», Փիթեր Բալաքյանի «Ճակատագրի սև շունը» գրքերը, որոնք նվիրված են 1915 թ. Հայոց ցեղասպանությանը:
