Հուլիսի 27-ին մեկնարկելիք ամառային օլիմպիական խաղերի նախաշեմին Լոնդոնում գրպանահատների մեծ ակտիվություն է նկատվում: Լոնդոնում մեկ օրում գրանցվում է գրպանահատման 1700 դեպք: Այս մասին հաղորդում է The Daily Mail-ը:
Պարբերականի փոխանցմամբ՝ վերջին 2 տարիներին գրպանահատության դեպքերի 17 տոկոս աճ է գրանցվել: 2011-2012 թվականներին գրանցվել է գրպանահատության 625 հազար դեպք՝ 102 հազարով ավելի 2009/2010 թթ-ի համեմատ:
Մեծ Բրիտանիայի ոստիկանությունը նախազգուշացնում է, որ Ռումինիայի, Լիտվայի և Հյուսիսային Աֆրիկայի պրոֆեսիոնալ հանցագործներն ուղղվել են Լոնդոն, որտեղ նրանց համար հնարավորությունների լայն հորիզոն է բացվել:
BBC-ի լրագրողները խոշորագույն մարզական միջոցառման նախաշեմին բացահայտել են պրոֆեսիոնալ գրպանահատների մարտավարությունը: Նրանք գործում են խմբով. անդամներից մեկը մոտենում և ուղղություն հարցնում, շեղում մարդու ուշադրությունը՝ հնարավորություն տալով մյուս անդամներին գործի անցնել: Նրանք կարող են շաբաթական 4000 ֆունտ ստեռլինգի եկամուտ ունենալ՝ գողանալով դրամապանակաները, սմարթֆոններն ու նոթբուքերի պայուսակները:
Մայրաքաղաքի ոստիկանությունը՝ Scotland Yard-ն արդեն 80 մարդու է ձերբակալել և նախազգուշացրել է, որ Լոնդոնում առաջիկա շաբաթներին նրանց հանդեպ թշնամական վերաբերմունք է սպասվում:
