Իսրայելի պաշտպանության նախարարությունը պայմանագիր է ստորագրել իտալական Alenia Aermacchi ընկերության հետ՝ M-346 Master մակնիշի 30 ուսումանամարտական ինքնաթիռներ ձեռք բերելու վերաբերյալ,- հաղորդում է Aviation Week-ը: 2012 թ. հուլիսի 19-ին կնքված գործարքի արժեքը կազմել է 600 մլն դոլար: Բացի այդ, իսրայելցի զինվորականները համաձայանագիր են ստորագրել Telespazio և Selex Elsag ընկերությունների հետ՝ Master ինքնաթիռների համար լրացուցիչ սարքավորումներ մատակարարելու համար:
Կնքված բոլոր պայմանագրերը միասին Իսրայելի պաշտպանության նախարարությանը արժեցել են 850 մլն դոլար: Համաձայնագրի պայմաններով՝ իսրայելական ռազմաօդային ուժերը առաջին M-346-երը կստանան 2014 թ. կեսերին: Իտալական ինքնաթիռները պետք է աստիճանաբար փոխարինեն հնացած A-4 Skyhawk գրոհային ինքնաթիռներին:
Ավելի վաղ հաղորդվում էր, որ, այդ պայմանագրից բացի, կստորագրվի օֆսեթային համաձայնագիր, որի շրջանակներում Alenia Aermacchi-ն պետք է իսրայելական ընկերությունից ձեռք բերի ռազմական արտադրանք՝ համապատասխան վաճառած իքնաթիռների գումարին: Ենթադրվում է, որ Իտալիային կարող է հետաքրքրել Israel Aerospace Industries պետական ընկերության արտադրանքը:
