Գլենդելաբնակ բռնցքամարտիկ, թեթևքաշային Արտ Հովհաննիսյանը պատրաստվում է ռինգ դուրս գալ Միգել Ակոստայի հետ: Դա կլինի վերջին մեկ տարում նրա առաջին մենամարտը: Glendale News Press-ի փոխանցմամբ՝ «Առյուծասիրտ» Հովհաննիսյանը մարզվում է Glendale Fighting Club-ում:
Հովհաննիսյանը գիտակցում է, որ դա իր կարիերայի կարևորագույն հանդիպումն է:
«Սա իմ կյանքի ամենամեծ մենամարտն է»,- ասել է Հովհաննիսյանը, որը պատրաստվել է այսօր կայանալիք 10 ռաունդով մարտին՝ Glendale Fighting Club-ի սեփականատեր Էդմոն Թարվերդյանի գլխավորությամբ: «Ես պատրաստ եմ պայքարին, կռվի ծարավ եմ զգում, քանի որ վերջին մարտս տեղի է ունեցել անցած օգոստոսին»,- ասել է հայազգի բռնցքամարտիկը:
Արտյոմ Հովհաննիսյանը գերթեթևքաշային կարգում ունեցել է 16 հանդիպում, որից 14-ը ավարտել է հաղթանակով, այդ թվում 8-ը՝ նոկաուտով: Մյուս երկու հանդիպումներ ավարտվել են ոչ-ոքի: Բռնցքամարտիկը պարտություն չի գրանցել:
Հանդիպումը տեղի կունենա Սանտա Ինեսի Chumash Casino-ում և հասանելի կլինի Showtime կաբելային ցանցով:
34-ամյա վենեսուելացի Ակոստան, ամենայն հավանականությամբ, կլինի 30 տարեկան գյումրեցու 6-ամյա կարիերայի ամենավտանգավոր մրցակիցը: Ակոստան աշխարհի բազամակի չեմպիոն է:
«Ինձ համար նշանակություն չունի, թե մրցակիցս ով է,-ասել է Հովհաննիսյանը։- Մենք աշխատել ենք իմ արագության և ուժի վրա, այնպես որ, ուրբաթ օրը ես կապացուցեմ, որ նրանից ուժեղ եմ»:
