Ինչպես հաղորդում է BBC-ն, Մալիի իսլամիստներն ազատ են արձակել մարդասիրական առաքելություն իրականացնող 3 եվրոպացի աշխատակիցների: Չի հաղորդվում` նրանց համար արդյոք փրկագին վճարվե՞լ է, թե՞ ոչ:
Մարդասիրական առաքելություն իրականացնող Իսպանիայի երկու և Իտալիայի մեկ քաղաքացիներ առևանգվել էին 2011թ. հոկտեմբերի 23-ին` Ալժիրի արևմուտքում, փախստականների ճամբարից: Իսպանացի և իտալացի դիվանագետները հաստատել են, որ իսլամիստական «Մուջաո» ռազմական խմբավորումն ազատ է արձակել եվրոպացիներին, որոնք գերության մեջ անցկացրել են մոտ 9 ամիս:
Իսլամիստական ապստամբների գործողությունները Մալիում հանգեցրել են անկայուն իրավիճակի սրման, որտեղ 2012թ. մարտին տեղի ունեցավ ռազմական հեղաշրջում: Իշխանությունը զավթած խունտան, սակայն, պատժամիջոցների սպառնալիքի տակ համաձայնեց կարճ ժամանակ անց հանձնել իշխանությունը: Սակայն ղեկավարության շրջանում անկայուն վիճակի պատճառով կառավարությանը մինչ այժմ չի հաջողվում վերականգնել վերահսկողությունը երկրի հյուսիսում, որտեղ իշխանությունը զավթել են իսլամիստները:
«Մուջաո» խմբի ապստամբներն ամուր կապեր ունեն «Ալ-Քաիդան իսլամական Մաղդրիբի երկրներում» կազմակերպության հետ: