Արգենտինական իշխանությունները ԱՄՆ ռազմական իշխանություններից բացատրություն են պահանջել այն բանից հետո, երբ Բուենոս Այրեսում վայրէջք կատարած օդանավում հայտնաբերվել է չհայտարարագրված բեռ, որի մեջ եղել է զենք և թմրանյութ: Այս մասին հաղորդում է France Presse գործակալությունը:
Արգելված բեռի տեղափոխման փաստը հայտնաբերել են արգենտինացի մաքսային աշխատողները, երբ ստուգել են ԱՄՆ ռազմաօդային ուժերի C-17 ինքնաթիռը: Բեռի մեջ եղել են մորֆիի մեծաքանակ չափաբաժիններ, որոնց համար չկային համապատասխան փաստաթղթեր:
Բեռն առգրավված է, իսկ արգենտինական իշխանությունները կոչ են արել ամերիկացիներին համատեղ քննություն սկսել:
Ամերիկացիներն իրենց հերթին հայտարարել են, որ այդ բեռը նախատեսված է եղել համատեղ զորավարժություններ անցկացնելու համար, իսկ ինքնաթիռի մեջ չէին կարող արգելված իրեր լինել: «Մենք զարմացած և մտահոգված ենք Արգենտինայի իշխանությունների գործողություններով: Կոչ ենք անում Արգենտինայի կառավարությանը վերադարձնել մեր սարքավորումները»,- ասել է պետդեպարտամենտի հատուկ ներկայացուցիչ Ֆիլիփ Քրոուլին: Նա նաև ավելացրել է, որ ինքնաթիռի զննումը համաձայնեցված չի եղել ամերիկյան կողմի հետ:
Շատերն այս միջադեպը լուրջ սկանդալ են համարում, քանի որ ամերիկյան զինվորական իշխանությունները, փաստորեն, մեղադրվում են անօրինական զենք և թմրանյութ տեղափոխելու մեջ, ինչը չի կարող չմտահոգել ԱՄՆ իշխանություններին:
