Լոնդոնում կայանալիք 30-րդ օլիմպիական խաղերին 8 օր է մնացել: Խաղերին մասնակցող Հայաստանի ազգային օլիմպիական կոմիտեի պատվիրակությունը ներկայացնելու է 25 մարզիկ:
Օլիմպիական խաղերին ընդառաջ` պատվիրակության կազմի կատարած աշխատանքների մասին խոսեց ՀՀ սպորտի և երիտասարդության հարցերի նախարար Հրաչյա Ռոստոմյանը: Նա նշեց, որ նպատակադրվել են 25 մասնակիցների թիվն ավելացնել: Ըստ նախարարի` այս խաղերի միակ ֆիասկոն Ռոման Ամոյանի բացակայությունն է:
Հարցին` ովքե՞ր կլինեն մեդալների հավակնորդներ, Ռոստոմյանը պատասխանեց, որ օլիմպիական խաղերին մասնակցության ուղեգիր ձեռք բերած մարզիկները վարկանիշ ունեցող մարզիկներ են, առաջատար են, ուստի սպասելիքներ ունեն բոլորից:
Նախարարի խոսքով` այս խաղերին մեդալները պետք է ավելի շատ լինեն, և Հայաստանի մասնակցությունը պետք է ավելի մեծ լինի, քան Պեկինում: Այսօր ևս նախարարը շեշտեց, որ գլխավորը մասնակցությունն է և արվել է ամեն ինչ բոլոր մարզիչների և մարզիկների պահանջները բավարարելու համար:
«Եթե բախտը մեզ ժպտա, ամեն ինչ լավ կլինի»,- ասաց նախարարը:
Նախարարի վստահեցմամբ` արդեն ավարտվել են օլիմպիական խաղերի նախապատրաստական բոլոր աշխատանքները, և մարզիկները պատրաստ են:
