Կոալիցիային հավատարիմ մնալու Գագիկ Ծառուկյանի հայտարարությունն, ըստ քաղտեխնոլոգ Կարեն Քոչարյանի, դեռ ոչինչ չի նշանակում:
Քաղտեխնոլոգի գնահատմամբ, եթե Ռոբերտ Քոչարյանը մտնի խաղի մեջ, ապա կկարողանա ազդեցություն ունենալ քաղաքական գործընթացների վրա: Ըստ Կարեն Քոչարյանի` Քոչարյանը «խաղի մեջ» կմտնի, եթե իր և իր բիզնեսի անվտանգության առումով տնտեսական երաշխիքներ չստանա:
Կարեն Քոչարյանը համաձայն չէ ՆԺԿ ղեկավար Արամ Կարապետյանի այն գնահատմանը, թե Ռոբերտ Քոչարյանը կդնի իր թեկնածությունը այն դեպքում, եթե Պուտինը ևս առաջադրվի որպես նախագահի թեկնածու. «Պուտինը կարող է դնի, իսկ Քոչարյանը` ոչ: Արամ Կարապետյանը նաև ասաց, թե Սերժ Սարգսյանի տանիքն էլ է Պուտինը: Դա իմ համար միանշանակ չէ»:
Վերջին շրջանում քաղաքական օրակարգում հիմնականում քննարկվում են ներկոալիցիոն խնդիրները, իսկ ընդդիմությունը պասիվություն է ցուցաբերում: Կարեն Քոչարյանի գնահատմամբ, այստեղ ընդդիմության խնդիրը չէ, այլ հասարակության. «Եթե հասարակությանը հետաքրքրեց այն, ինչ որ նույն այդ հասարակությանը հետաքրքրեց 2007թ., և նրանք դուրս եկան փողոց, ապա այս անգամ էլ դուրս կգան, իսկ եթե չհետաքրքրի, ապա կլինի այն, ինչ որ կա վերջին երկու տարիների ընթացքում»:
Քոչարյանի կարծիքով, այսօր հայ հասարակությանը փողոց դուրս կբերեն արդարության և սոցիալական խնդիրները. որովհետև այդ խնդիրներն իրենց թույլատրելի սահմանն անցել են. «Քաղաքական, գաղափարական խնդիր` որպես այդպիսին, այսօր չկա: Հասարակության համար կարևոր չէ, թե ով կլինի նախագահը` Լևոն Տեր-Պետրոսյանը, Ռոբերտ Քոչարյանը, Սերժ Սարգսյանը, թե չորրորդ անձ: Խնդիրն այն է, որ պետության մեջ կարգավորվի անարդարության հարցը և մեղմվեն սոցիալական խնդիրները»: