ԱՄՆ պետքարտուղար Հիլարի Քլինթոնը կոչ է արել միջազգային հանրությանը Սիրիայի հարցում ճնշում գործադրել Ռուսաստանի վրա: CNN-ի եթերում Քլինթոնն ասել է, որ պետք է համոզել Մոսկվային ՄԱԿ-ի Անվտանգության խորհրդում ընդունելու արևմտյան երկրների առաջարկած բանաձևը:
Փաստաթուղթը նախատեսում է Սիրիայի հարցում կիրառել ՄԱԿ-ի Կանոնադրության 7-րդ գլուխը, որը թույլ է տալիս կիրառել Քլինթոնի խոսքերով՝ «շատ կոշտ» պատժամիջոցներ Սիրիայի նախագահ Բաշար Ալ-Ասադի, ինչպես նաև այն մարդկանց դեմ, ովքեր աջակցություն են ցուցաբերում նրա վարչակարգին: Այդ բանաձևի նախագիծն աջակցություն է ստացել Ֆրանսիայի, Գերմանիայի և ԱՄՆ-ի կողմից, դրան դեմ է արտահայտվում Ռուսաստանը, որը ԱԽ-ում վետոյի իրավունք ունի: Նախագծի առնչությամբ իր դժգոհությունն է հայտնել նաև Չինաստանը:
Այդ բանաձևի ընդունումը, պետքարտուղարի խոսքերով, կլիներ «ամենահստակ ազդաշանը Ասադի համար՝ վկայելով այն մասին, որ նրա օրերը հաշված են»: Քլինթոնը նաև կարծում է, որ մինչ այժմ, քանի դեռ Սիրիային «աջակցում է Իրանը, իսկ Ռուսաստանը չի կողմնորոշվել՝ արդյո՞ք պետք է ավելի վճռական հանդես գալ նրա դեմ, քան անում էր նախկինում», Ասադը համոզված կլինի, որ կարող է «շարունակել նույն ոգով»:
Ակնկալվում է, որ հուլիսի 18-ին ՄԱԿ-ի ԱԽ-ն կուսումնասիրի Սիրիայի հարցով բանաձևի երկու՝ ռուսական և արևմտյան նախագծերը:
