ԼՂՀ նախկին արտգործնախարար Արման Մելիքյանի գնահատմամբ, ԵԱՀԿ Մինսկի խմբի համանախագահների վերջին այցը տարածաշրջան հերթական էր.
«Մեծ հաշվով, իրենք էլ են փորձում իրենց գործունեությանը որոշակիություն հաղորդել: Տարիներ շարունակ գալիս են տարածաշրջան, գնում են, հայտարարություններ են անում, սա նրանց հերթական այցելությունն էր: Մեծ հաշվով, Աստանայում կայացած ԵԱՀԿ գագաթնաժողովում ֆիքսվեց ստատուս քվոյի պահպանման անհրաժեշտությունը»:
«Առաջին լրատվականի» հետ զրույցում Մելիքյանը նշեց, որ համանախագահները և համանախագահող երկրների այլ ներկայացուցիչներ խոսում էին հիմնականում ուժի չկիրառման և ուժի կիրառման սպառնալիքի վերացման անհրաժեշտության մասին, ինչն էլ այսօրվա դրությամբ նշանակում է ստատուս քվոյի պահպանմանն ուղղված նախաձեռնություն:
«Այդ համատեքստում եռանախագահների այցելությունը տարածաշրջան որևէ նոր շեշտադրում չբերեց իր հետ, և այդ կարգի հայտարարությունները իրական հիմք չունեն»:
Համանախագահների տարածաշրջան կատարած այցից հետո արած հայտարարության մեջ մասնավորապես նշվում է, որ վճռական քայլեր անելու պահը եկել է: Արման Մելիքյանի գնահատմամբ` իրավիճակը չի փոխվել և այդ փոփոխության համար նախադրյալներ էլ չկան.
«Համանախագահ երկրները գերադասում են ստատուս քվոն պատերազմական ճանապարհով հարցը լուծելուց: Ես նախադրյալ չեմ տեսնում որպեսզի կտրուկ քայլեր լինեն: Ժամանակին անընդհատ խոսում էին խնդրի լուծման ոսկե պատուհանի մասին: Այս ամենը պարզապես գործընթացը պահելու միջոց է. անընդհատ հուսադրելու կողմերին. բայց լուծումը այս ձևաչափում և բանակցային այս տրամաբանությամբ անհնարին է»:
Մելիքյանի խոսքերով, պետք է փոխվի բանակցային գործընթացի տրամաբանությունը` պետք է առաջարկվեն նոր մոտեցումներ, որոնք բանակցային օրակարգում կընդգրկեն ադրբեջանահայ փախստականների հարցը:
