Սառա Ջեսիկա Փարքերը կխաղա Vogue ամսագրի աշխատակցուհու դերը՝ «Ցնծություն» (Glee) սերիալում: Այս մասին հաղորդում է AcessHollywood-ը:
Սերիալի պրոդյուսերներից մեկի՝ Իեն Բրեննանի խոսքով՝ սերիալում հերոսուհի Փարքերը պետք է ղեկավարի Vogue.com կայքը: Սյուժեի համաձայն՝ երկու գլխավոր հերոսները՝ Ռեյչելն ու Քուրթը, պետք է հանդիպեն նրան Նյու Յորքում: Ենթադրվում է, որ դերասանուհին կնկարահանվի մի քանի դրվագներում, որոնց թիվը չի հստակեցվում:
Սերիալը Fox հեռուստաալիքի եթերում է 2009-ի մայիսից: Հեռուստադիտողին է ներկայացվել արդեն 3 եթերաշրջան, այդ թվում՝ 66 դրվագ:
Սառա Ջեսիկա Փարքերին մեծ ճանաչում է բերել «Սեքսը մեծ քաղաքում» հեռուստասերիալը, որում նա կատարել է գլխավոր դերը: Դերասանուհին նկարահանվել է նաև սերիալի մոտիվներով թողարկված երկու լիամետրաժ ֆիլմերում: Դերասանուհին նկարահանվել է նաև «Մարսը հարձակվում է», «Մորգան ամուսինները` փախուստի մեջ», «Էդ Վուդ», «Ես չգիտեմ, թե նա ինչպես է դա անում» ֆիլմերում:
