Ադրբեջանում ԱՄՆ դեսպանության մամլո քարտուղար Քիթ Բինը հայտարարել է, որ ԱՄՆ իշխանությունները կրկնում են հունվարի 28-ին հայտարարված նախազգուշացումը, որի համաձայն Ադրբեջանում ահաբեկչության սպառնալիք է առկա:
«Մենք տեղեկություն ենք տրամադրում ԱՄՆ քաղաքացիներին, նրանց տեղեկացվածությունը բարձրացնելու համար, որպեսզի նրանք կարողանան ավելի խելամիտ ծրագրել իրենց ճամփորդությունը: Մենք չենք մեկնաբանում մեր աղբյուրների սպառնալիքի մասին տեղեկատվությունը, սակայն կարծում ենք, որ այդ սպառնալիքը իրական է, այդ իսկ պատճառով կոչ ենք անում ԱՄՆ քաղաքացիներին զգուշավոր լինել»,- ասել է Բինը:
1news.az-ին Բինը նաև ասել է, որ դիվանագիտական ներկայացուցչությունն աշխատում է Ադրբեջանի կառավարության համապատասխան մարմինների հետ` դեսպանության աշխատակիցների անվտանգությունը պատշաճ ապահովելու համար:
Ավելի վաղ տեղեկացրել էինք, որ ԱՄՆ իշխանությունները այսօր թարմացրել են իրենց նախազգուշացումը, որ Ադրբեջանում ահաբեկչության իրական սպառնալիք կա:
Ադրբեջանի իրավապահներն, իրենց հերթին, հայտարարել են, որ դիվանագիտական ներկայացուցչությունների անվտանգությունն իրենց երկրում ապահովված է պատշաճ մակարդակով, իսկ ահաբեկչության սպառնալիքից զերծ չէ աշխարհում ոչ մի երկիր:
