Ազգային ժողովի արտաքին հարաբերությունների հանձնաժողովի նախագահ Արտակ Զաքարյանը հուլիսի 17-ին հանդիպել է ՀՀ-ում Չինաստանի Ժողովրդական Հանրապետության արտակարգ և լիազոր դեսպան Թիան Չանչունին:
Հայ-չինական հարաբերությունները, դեսպանի գնահատմամբ, անկախացումից ի վեր և դիվանագիտական հարաբերություններ հաստատելու 20-ամյակի շեմին հասել են բարձր մակարդակի, և դրան նպաստել են երկու պետությունների ղեկավարների ակտիվ շփումներն ու նրանց նախանշած համագործակցության ճիշտ ուղղություններն ու ոլորտները:
Արտակ Զաքարյանը, շնորհակալություն հայտնելով Չինաստանի պետական հաստատությունների կողմից ՀՀ-ին ցուցաբերվող տարաբնույթ աջակցության համար, կարևորեց Չինաստանի հետ հարաբերությունների զարգացումը` ընդգծելով քաղաքական, տնտեսական, գիտակրթական, միջտարածաշրջանային և այլ ոլորտներում համագործակցության մեծ ներուժը: Հանձնաժողովի նախագահի գնահատմամբ, սակայն, շփումերը հատկապես միջխորհրդարանական մակարդակում այնքան էլ ակտիվ չեն, համագործակցության ներուժն օգտագործված չէ ամբողջությամբ:
Կողմերը միջպետական կապերն էլ ավելի ամրապնդելու համար միջխորհրդարանական փոխգործակցությունը լավ ձևափաչափ են համարել` խորհրդարանների միջև հարաբերությունները ակտիվացնելու պատրաստակամություն հայտնելով: Հատկապես կարևորվել է Հայաստան-Չինաստան խորհրդարանական բարեկամական խմբի գործունեության ակտիվացումը:
Զրուցակիցներն անդրադարձել են նաև միջկուսակցական գործակցությանն ու դրա ընձեռած հնարավորություններին: Դեսպանի խոսքով` խորհրդարանական վերջին ընտրությունները վկայում են, որ Հայաստանի Հանրապետական կուսակցությունը վստահություն է վայելում և երկիրը կառավարելու ճիշտ ուղիներ է ընտրել: Չինաստանում խորհրդարանական ընտրություններ կանցկացվեն մարտին, մինչ այդ Կոմունիստական կուսակցության 18-րդ համագումարում կհստակեցվեն, թե ովքեր կլինեն պետության ու կուսակցության ղեկավարները:
Հանդիպման ընթացքում խոսվել է նաև երկու երկրների համար կարևոր նշանակություն ունեցող հարցերում փոխադարձ աջակցության ու միջազգային կառույցներում համագործակցության մասին:
Անդրադառնալով ԼՂ հակամարտության կարգավորմանը` ՉԺՀ դեսպանը շնորհակալություն է հայտնել Հայաստանին` խնդիրը միայն խաղաղ բանակցությունների ճանապարհով հանգուցալուծելու դիրքորոշման, տարածաշրջանում խաղաղություն և կայունություն պահպանելու ջանքերի համար: Նրա խոսքով` առանց կայունության հնարավոր չէ զարգացնել տնտեսությունը, հասնել վերջնական խաղաղության ու նոր ծրագրեր իրականացնել:
Արտակ Զաքարյանն իր հերթին շնորհակալություն է հայտնել դեսպանին ԼՂ հարցում Չինաստանի որդեգրած հավասարակշիռ և կառուցողական դիրքորոշման համար, որը պարբերաբար արտահայտվում է մասնավորապես ՄԱԿ-ում:
ՀՀ ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ զրուցակիցները խոսել են նաև կրթամշակութային, ուսանողների փոխանակման և լեզվի ուսուցման ծրագրերի մասին` նորերի մեկնարկին աջակցելու պատրաստակամությամբ: