Չնայած Պաշտպանության նախարարության այն հայտարարություններին, թե բանակում կարգապահությունը խստացվել է, վերջին օրերին բանակում արձանագրվող մահացության դեպքերը կրկին շատացել են:
«Առաջին լրատվականի» հետ զրույցում, պաշտպանության նախկին փոխնախարար Անդրանիկ Քոչարյանը նշեց, թե պաշտպանության նախարարությունը չի կարող գործ չանել, բայց հարց է, թե այդ գործը որոշակի արդյունք տալի՞ս է, թե՞ ոչ.
«Բանակում մահացության դեպքերը շարունակաբար կրկնվում են, և ՊՆ աշխատանքը որևէ արդյունքի դեռ չի բերել: Պետք է իրենք լրջորեն հասկանան, որ պետք է խնդիրներին մոտենալ շատ ավելի խորքային և հրաժարվեն այն բացասական երևույթներից. որոնք այսօր բանակում արմատացած են: Քանի դեռ դրանցից չեն հրաժարվել, քանի դեռ հրամանատարների ձեռքերը ազատ են, ինչ ուզում, անում են զորամասերում, ինչն էլ ազդում է զինվորի վրա և հանգեցնում ողբերգական դեպքերի, բանակի խնդիրները չեն կարող կարգավորվել: Դրական բան բանակում այս պահի դրությամբ ո՛չ տեսանելի է, ո՛չ էլ հնարավոր է ակնկալել»:
Հարցին, թե ինչու բանակում արձանագրված սպանություններից հետո Պաշտպանության նախարար Սեյրան Օհանյանին չեն հեռացնում այդ պաշտոնից, Քոչարյանը պատասխանեց.
«Սեյրան Օհանյանը ղարաբաղյան պատերազմում որոշիչ դերակատարություն ունեցող զորավարներից մեկն է: Եվ նախարարության լավ կամ վատ աշխատանքը միայն նրանով պայմանավորված չէ: Խնդիրները շատ ավելի բարդ են և առնչվում են պետական ամբողջ կառավարման համակարգի հետ: Վերջիվերջո, Սեյրան Օհանյանի վերևում էլ կա գերագույն գլխավոր հրամանատար, որի անմիջական հսկողության տակ պետք է լիներ բանակում կատարվող բոլոր դեպքերը և դրանց վերաբերյալ որոշումներ կայացնելը»:
Քոչարյանի գնահատմամբ, բանակը ճգնաժամի շեմին է և պետք է ամեն ինչ անել, որպեսզի ճգնաժամից շատ արագ դուրս գա:
Սակայն, ըստ Քոչարյանի, այս պահին իշխանությունները որևէ ցանկություն չունեն բանակում ստեղծված ճգնաժամը հաղթահարելուն միտված գործողություննեչ իրականացնելու, որովհետև իշխանությունները Մարտի մեկից առաջ և հետո բանակը դիտում են որպես իշխանության մաս և ոչ թե պետության անվտանգությունն ապահովող պետական կարևորագույն համակարգ: