Ոչ մի ապացույց չկա, որ ԱՄՆ և Եվրահանձնաժողովի կազմակերպմամբ Հայաստանում և Վրաստանում օրերս անցկացված միջուկային անվտանգության խորագրով վարժանքներն ուղղված են Իրանի դեմ: «Առաջին լրատվական»-ի հետ զրույցում նման տեսակետ հայտնեց Վրաստանի դիվանագիտական ակադեմիայի ռեկտոր, քաղաքագետ Սոսո Ցինցաձեն:
Հիշեցնենք, որ ավելի վաղ քաղաքագետ Սերգեյ Շաքարյանցը «Առաջին լրատվական»-ի հետ զրույցում կարծիք էր հայտնել, որ այդ վարժանքները հակաիրանական բնույթ են կրում և թելադրված են ԱՄՆ կողմից:
«Հայաստանի տարածքում ատոմակայան կա, և դա ընդհանուր անհանգստության հարց է: Ատոմակայանի անվտանգության հարցը վերաբերում է ոչ միայն հայ ժողովրդին, այլ նաև տարածաշրջանի երկրների բնակչությանը: Այնպես որ, համագործակցությունն այս ոլորտում անհետաձգելի հարց է, և ոչ մի տարօրինակ հանգամանք չկա դրանում: Մենք էլ ոչ պակաս հետաքրքրված ենք ձեր ատոմակայանի անվտանգության բարձրացմամբ»,- ասաց Ցինցաձեն:
Նա հիշեցրեց, որ Վրաստանն Իրանի հետ ունի նորմալ դիվանագիտական, իսկ Հայաստանը՝ բարիդրացիական հարաբերություններ: Եվ այս պայմաններում, ըստ Ցինցաձեի, պաշտոնական Թբիլիսին կամ Երևանը համատեղ գործողություններ չեն ձեռնարկի Իրանի դեմ: Իսկ բացատրությունը շատ պարզ է՝ հակաիրանական որևէ քայլ Հայաստանի կամ Վրաստանի հետարքրքությունների շրջանակից դուրս է:
Այն դիտարկմանը, որ ԱՄՆ գործոնը որոշակի կասկածների տեղիք է տալիս, քաղաքագետը նման պատասխան տվեց. «Դե, կարող է ամերիկացիներն ունեն իրենց ծրագիրը, բայց Վրաստանը և Հայաստանը գործում են ոչ թե որևէ երրորդ երկրի հետաքրքրությունների շրջանակում կամ թելադրանքով, այլ առաջին հերթին սեփական ժողովուրդների կամքի շրջանակներում: Չպետք է մոռանալ, որ ԱՄՆ-ն մեզանից շատ հեռու է, բայց մենք Իրանի հետ հարևաններ ենք: Չի բացառվում, որ ամերիկյան գործոնը կա այս ամենում, բայց այս փուլում հստակ մեկնաբանել, որ ինչ-որ հակաիրանական ծրագիր կա, դա շատ բարդ է: Ես չեմ տիրապետում նման որևէ տեղեկատվության»: